ഇരിങ്ങാലക്കുട : സമൂഹ മാധ്യമങ്ങളിലൂടെ ഏറെ ശ്രദ്ധ നേടിയ പ്രണവ് ഷഹാന ദമ്പതികളില്‍ ഷഹാനയെ തനിച്ചാക്കി പ്രണവ് യാത്രയായി, വേദനകളില്ലാത്ത ലോകത്തിലേക്ക്. തൃശ്ശൂര്‍ കണ്ണിക്കര സ്വദേശി പ്രണവ് (31) വെള്ളിയാഴ്ച രാവിലെ രക്തം ഛര്‍ദ്ദിച്ചതിനെ തുടര്‍ന്ന് അവശനാവുകയായിരുന്നു. ഉടന്‍ തന്നെ ആശുപത്രിയില്‍ എത്തിച്ചുവെങ്കിലും ജീവന്‍ രക്ഷിക്കാനായില്ല.
വാഹനാപകടത്തെ തുടര്‍ന്ന് ശരീരം തളര്‍ന്ന് വീല്‍ ചെയറിലായ പ്രണവിന്റെ ജീവിതത്തിലേക്ക് 2020ലാണ് ഷഹാന കടന്നു വരുന്നത്. അത് സമൂഹ മാധ്യമങ്ങളില്‍ വാര്‍ത്തയായതോടെയാണ് ദമ്പതികള്‍ ശ്രദ്ധിക്കപ്പെടുന്നത്. പ്രണവ് ഷഹാന എന്ന പേരിലാണ് ഇദ്ദേഹം സമൂഹമാധ്യമങ്ങളില്‍ അറിയപ്പെട്ടിരുന്നത്.
എട്ട് വര്‍ഷങ്ങള്‍ക്ക് മുമ്പുണ്ടായ വാഹനാപകടത്തില്‍ പ്രണവിന്റെ നട്ടെല്ലിന് ഗുരുതരമായി പരിക്കേല്‍ക്കുകയും ശരീരം പൂര്‍ണ്ണമായും തളരുകയുമായിരുന്നു. തുടര്‍ന്ന് ബന്ധുക്കളുടെയും സുഹൃത്തുക്കളുടേയും പിന്തുണയോടെ പ്രണവ് തന്റെ മനസ്സാന്നിധ്യം കൊണ്ട് ശരീരത്തിന്റെ തളര്‍ച്ച മറികടക്കുകയായിരുന്നു. 2022 മാര്‍ച്ച് നാലിനാണ് പ്രണവ് തിരുവനന്തപുരം സ്വദേശിയായ ഷഹാനയെ ജീവിത സഖിയാക്കുന്നത്. പ്രണവിന്റെ സമൂഹ മാധ്യമങ്ങളിലെ പോസ്റ്റുകളും വീഡിയോകളുമാണ് ഷഹാനയെ സ്വാധീനിച്ചത്. പ്രണയം തുറന്നുപറഞ്ഞെങ്കിലും പ്രണവ് അതിനെ ആദ്യം പറഞ്ഞുമനസ്സിലാക്കാനാണ് ശ്രമിച്ചത്. എന്നാല്‍ ഷഹാനയുടെ തീരുമാനത്തില്‍ മാറ്റം വരാതിരുന്നതോടെ ഒട്ടേറെ എതിര്‍പ്പുകള്‍ മറികടന്നാണ് ഇരുവരും ഒന്നായത്.
റോഡ് സുരക്ഷയുമായി ബന്ധപ്പെട്ട ബോധവല്‍ക്കരണ പരിപാടികളില്‍ സജീവമായിരുന്നു. വാഹനാപകടങ്ങളില്‍ തകര്‍ന്ന് സമാനാവസ്ഥയില്‍ കഴിയുന്ന ഒട്ടേറെ ആളുകള്‍ക്ക് പ്രണവ് പ്രചോദനവുമായിരുന്നു. മണപ്പറമ്പില്‍ സുരേഷ് ബാബുവിന്റെയും സുനിതയുടെയും മകനാണ് പ്രണവ്.
പ്രതികരിക്കാൻ ഇവിടെ എഴുതുക: