തിരുവനന്തപുരം : നിയമസഭാ തെരഞ്ഞെടുപ്പ് പരാജയത്തിന് കാരണക്കാരായവര്ക്കെതിരെ നടപടി സ്വീകരിച്ചില്ലെന്ന് ആരോപിച്ച് തിരുവനന്തപുരത്ത് വട്ടിയൂര്ക്കാവില് കോണ്ഗ്രസ്സില് കൂട്ടരാജി. ഡിസിസി നേതാക്കളടക്കം നൂറിലധികം അംഗങ്ങളാണ് പാര്ട്ടി വിടുന്നത്. ഇവര് കെപിസിസി അധ്യക്ഷന് കെ.സുധാകരന് രാജിക്കത്ത് കൈമാറി.
2021ലെ നിയമസഭാ തെരഞ്ഞെടുപ്പില് വട്ടിയൂര്ക്കാവിലെ സ്ഥാനാര്ത്ഥി ദയനീയ പരാജയം ഏറ്റു വാങ്ങിയതുമായി ബന്ധപ്പെട്ടുള്ള പരാതികളില് നടപടി സ്വീകരിച്ചില്ലെന്ന് ആരോപിച്ചാണ് പ്രവര്ത്തകര് കൂട്ടരാജിവെയ്ക്കുന്നത്. നിയമസഭാ തെരഞ്ഞെടുപ്പ് സ്ഥാനാര്ത്ഥി നിര്ണയവുമായി ബന്ധപ്പെട്ട് കെപിസിസി അംഗങ്ങളായ സുദര്ശനും ശാസ്തമംഗലം മോഹനനും ആദ്യം പരസ്യവിമര്ശനമുന്നയിരുന്നു. പിന്നീട് ഇവര്തന്നെ തെരഞ്ഞെടുപ്പ് കമ്മിറ്റി ഭാരവാഹിത്വം ഏറ്റെടുത്ത് തെരഞ്ഞെടുപ്പ് പ്രവര്ത്തനങ്ങള് അട്ടിമറിച്ചെന്നുമാണ് ആരോപണം.
ഫലത്തില് കോണ്ഗ്രസ് സ്ഥാനാര്ത്ഥി മൂന്നാം സ്ഥാനത്തായിരുന്നു. തുടര്ന്ന് ഇരുവര്ക്കുമെതിരെ നടപടി ആവശ്യപ്പെട്ടെങ്കിലും നടപടിയൊന്നും സ്വീകരിക്കാത്തതില് പ്രതിഷേധിച്ച് കോണ്ഗ്രസ് അംഗങ്ങള് കൂട്ടത്തോടെ രാജിവെയ്ക്കുകയായിരുന്നു.
തെരഞ്ഞെടുപ്പ് പരാജയത്തിന് ഉത്തരവാദികളായവര് ഇപ്പോഴും നേതൃത്വത്തില് വിലസുകയാണെന്നും ഇവര്ക്കെതിരേ നടപടി സ്വീകരിക്കുന്നില്ല. തെരഞ്ഞെടുപ്പ് കാലത്ത് ഇരുവരും എതിര് പാര്ട്ടിയുമായി രഹസ്യധാരണയുണ്ടാക്കുന്നുവെന്നും കൂട്ടരാജിയുടെ കാരണമായി പറയുന്നുണ്ട്. സ്ഥിരമായി പാര്ട്ടിവിരുദ്ധ നടപടികളില് ഏര്പ്പെടുന്നവര്ക്കെതിരേ നടപടി സ്വീകരിക്കാതെ അവരെ വീണ്ടും പുതിയ കമ്മിറ്റികളുടെ തലപ്പത്ത് നിയമിക്കുന്നതില് പ്രതിഷേധമുണ്ടെന്നും രാജിക്കത്തില് പറയുന്നു. കത്ത് കെപിസിസി ആധ്യക്ഷന് കൈമാറിയെങ്കിലും ഇത് സംബന്ധിച്ചുള്ള പ്രതികരണമൊന്നും വന്നിട്ടില്ല.
