ഭുവനേശ്വര്‍: ലോകകപ്പ് ഹോക്കി ചാമ്പ്യന്‍ഷിപ്പില്‍ ഇന്ത്യക്ക് ഇന്ന് നിര്‍ണായക ക്രോസ് ഓവര്‍ പോരാട്ടം. ഡി ഗ്രൂപ്പില്‍ ഇന്ത്യ ഏഴു പോയിന്റ് നേടിയെങ്കിലും മികച്ച ഗോള്‍ ശരാശരിയില്‍ ഇംഗ്ലണ്ട് നേരിട്ട് ക്വാര്‍ട്ടര്‍ ഫൈനലിലേക്ക് മുന്നേറി. ഇതോടെ ഇന്ത്യക്ക് ഗ്രൂപ്പ് സിയിലെ മൂന്നാം സ്ഥാനക്കാരായ ന്യൂസിലന്‍ഡുമായുള്ള ക്രോസ്ഓവര്‍ മത്സരം ഇന്ന് ജയിച്ചാലേ ക്വാര്‍ട്ടറില്‍ കടക്കാനാവൂ.
ഭുവനേശ്വറിലെ കലിംഗ സ്റ്റേഡിയത്തില്‍ ഇന്ന് രാത്രി ഏഴു മണിക്കാണ് കളി. ഗ്രൂപ്പിലെ താരതമ്യേന ദുര്‍ബലരായ വെയ്ല്‍സിനെതിരെ ഏകപക്ഷീയമായ എട്ടു ഗോള്‍ ജയം നേടിയിരുന്നെങ്കില്‍ ഇംഗ്ലണ്ടിനെ മറികടന്ന് ഇന്ത്യക്ക് ക്വാര്‍ട്ടറില്‍ കടക്കാനാവുമായിരുന്നു. എന്നാല്‍ വെയ്ല്‍സിനെതിരെ ഇന്ത്യ രണ്ടിനെതിരെ നാലു ഗോളുകള്‍ക്കാണ് ജയിച്ചത്. അതേസമയം ഇംഗ്ലണ്ട് മറുപടിയില്ലാത്ത നാലുഗോളുകള്‍ക്ക് സ്‌പെയിനിനെ പരാജയപ്പെടുത്തുകയും ചെയ്തു. ഇന്നു ജയിച്ചാല്‍ ക്വാര്‍ട്ടറില്‍ ബല്‍ജിയമാണ് ഇന്ത്യയുടെ എതിരാളികള്‍.
ക്രോസ്ഓവര്‍ കളിക്കുമുമ്പ് മധ്യനിര താരം ഹാര്‍ദിക് സിങ് പരിക്കേറ്റ് പുറത്തായത് ഇന്ത്യക്കു തിരിച്ചടിയായി. ഇംഗ്ലണ്ടിനെതിരായ കളിയില്‍ കൈക്കുഴയില്‍ പരിക്കേറ്റ ഹാര്‍ദിക്കിന് ന്യൂസിലന്‍ഡിനെതിരെ കളിക്കാന്‍ കഴിയില്ലെന്ന് മാനേജ്‌മെന്റ് അറിയിച്ചു. ഹാര്‍ദിക്കിനു പരകം രാജ് കുമാര്‍ പാല്‍ മധ്യനിരയില്‍ കളിക്കും.
അഞ്ചു ഹാട്രിക്കുകള്‍
ഗ്രൂപ്പിലെ അവസാന മത്സരങ്ങള്‍ അരങ്ങേറിയ ശനിയാഴ്ച കലിംഗ സ്റ്റേഡിയത്തില്‍ പിറന്നത് അഞ്ചു ഹാട്രിക്കുകള്‍. നാലുകളികളിലും ഒരു കളിക്കാരന്റെ ഹാട്രിക്ക് നേട്ടത്തോടെയാണ് ടീമുകള്‍ വിജയം നേടിയത്. 5-5 സമനിലയില്‍ പിരിഞ്ഞ ഫ്രാന്‍സ്, അര്‍ജന്റീന പോരാട്ടത്തില്‍ ഇടു ടീമില്‍ നിന്നും ഹാട്രിക് നേട്ടമുണ്ടായി. ഫ്രാന്‍സിന്റെ വിക്ടര്‍ ഷാര്‍ലെറ്റും അര്‍ജന്റീനയുടെ നിക്കോളാസ് ഡെല്ല ടാറയും ഹാട്രിക് തികച്ചു. ഓസ്‌ട്രേലിയയുടെ ബ്ലേക് ഗോവേഴ്‌സ്, ബെല്‍ജിയത്തിന്റെ ടോം ബൂണ്‍, ജര്‍മനിയുടെ നിക്‌ലാസ് വെല്ലെന്‍ എന്നിവരാണ് ഹാട്രിക് തികച്ച മറ്റു താരങ്ങള്‍. ശനിയാഴ്ചത്തെ നാലു കളികളില്‍ ആകെ അടിച്ചത് 38 ഗോളുകള്‍. ഗ്രൂപ്പ് എയില്‍ നിന്ന് ഓസ്‌ട്രേലിയയും ഗ്രൂപ്പ് ബിയില്‍ നിന്ന് ബെല്‍ജിയവും നേരിട്ടു ക്വാര്‍ട്ടറില്‍ കടന്നു. അര്‍ജന്റീന, ജര്‍മനി, ഫ്രാന്‍സ്, കൊറിയ ടീമുകള്‍ ക്വാര്‍ട്ടറില്‍ കടക്കാന്‍ ക്രോസ് ഓവര്‍ മത്സരങ്ങള്‍ കളിക്കണം.
പ്രതികരിക്കാൻ ഇവിടെ എഴുതുക: