കൊല്ലം: വിദ്യാര്ഥികള് സ്കൂളില് മൊബൈല് ഫോണ് കൊണ്ടുവരുന്നതില് വിലക്ക് വേണ്ടെന്നു സംസ്ഥാന ബാലാവകാശ കമ്മിഷന്. കോഴിക്കോട് വടകര സ്വദേശിയായ വിദ്യാര്ഥിയുടെ മൊബൈല് ഫോണ് സ്കൂള് അധികൃതര് പിടിച്ചെടുത്ത സംഭവത്തില് പിതാവ് നല്കിയ ഹര്ജിയിലാണ് ഉത്തരവ്. കുട്ടികള് മൊബൈല്ഫോണ് ഉപയോഗിച്ചാല് ആകാശം ഇടിഞ്ഞുവീഴുകയോ ഭൂമി നെടുകെ പിളരുകയോ ഇല്ലെന്നും കമ്മിഷന് അഭിപ്രായപ്പെട്ടു.അധ്യക്ഷന് കെ വി മനോജ് കുമാര്, ബി ബബിത, റെനി ആന്റണി എന്നിവര് ഉള്പ്പെട്ട ഫുള് ബെഞ്ചിന്റേതാണ് നിര്ദേശം.
പ്രത്യേക ആവശ്യങ്ങള്ക്കു രക്ഷിതാക്കളുടെ അറിവോടെ മൊബൈല് ഫോണ് കൊണ്ടുവരാമെന്നാണ് ഉത്തരവില് പറയുന്നത്. പിടിച്ചെടുത്ത മൊബൈല് ഫോണ് വിദ്യാര്ഥിക്കു തിരികെനല്കാനും ഉത്തരവായി. സ്കൂളുകളിൽ കുട്ടികൾ മൊബൈൽ ഫോൺ കൊണ്ടുവരുന്നുണ്ടോ എന്നറിയാനുള്ള ദേഹപരിശോധനയും ബാഗ് പരിശോധനയും പ്രാകൃതമാണ്. കുട്ടികളുടെ അന്തസ്സിനും ആത്മാഭിമാനത്തിനും ക്ഷതമുണ്ടാകും വിധത്തിലുളള പരിശോധനകൾ കർശനമായി ഒഴിവാക്കേണ്ടതാണെന്നും കമ്മീഷൻ നിരീക്ഷിച്ചു.
ഇന്റര്നെറ്റ്, മൊബൈല് ഫോണ്, സമൂഹമാധ്യമങ്ങള് എന്നിവ സുരക്ഷിതമായി ഉപയോഗിക്കാന് കുട്ടികള്ക്ക് പരിശീലനം നല്കുന്ന പദ്ധതിയും വേണമെന്ന് കമ്മിഷൻ കൂട്ടിച്ചേര്ത്തു. അധ്യക്ഷന് കെ വി മനോജ് കുമാര്, ബി ബബിത, റെനി ആന്റണി എന്നിവര് ഉള്പ്പെട്ട ഫുള് ബെഞ്ചിന്റേതാണ് നിര്ദേശം.
