വര്‍ക്കല: ശിവഗിരി തീര്‍ത്ഥാടനം ശ്രീനാരായണ ഗുരുദേവന്റെ മഹാ സങ്കല്‍പ്പ പ്രകാരം രൂപം പ്രാപിച്ചതാണെന്ന് ശ്രീനാരായണ ധര്‍മസംഘം പ്രസിഡന്റ് സ്വാമി സച്ചിദാനന്ദ. ഗൃഹസ്ഥ ഭക്തന്മാര്‍ക്കായി എസ്എന്‍ഡിപി യോഗവും സംന്യാസിമാര്‍ക്കായി ധര്‍മ്മസംഘവും വൈദിക ശിഷ്യന്‍മാര്‍ക്കായി വൈദികമഠവും സംസ്ഥാപനം ചെയ്ത മഹാഗുരു ശിവഗിരി ഒരു തീര്‍ത്ഥാടന കേന്ദ്രമായി വിഭാവനം ചെയ്തുകൊണ്ട് ശാരദാ മഠവും വൈദിക മഠവും സര്‍വമത പാഠശാലയും സ്ഥാപിച്ച് മഹാസമാധി സ്മാരകമായി ശിവഗിരിയെ തന്നെ സങ്കല്‍പ്പിക്കുകയും ചെയ്തു.
ഗുരുദേവന്റെ സായാഹ്ന ഗീതോപദേശമായി ശിവഗിരി തീര്‍ത്ഥാടനത്തെ വിഭാവനം ചെയ്തുവെന്നും സ്വാമി പറഞ്ഞു. ശിവഗിരി തീര്‍ത്ഥാടനകാല സമാപന സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. എസ്എന്‍ഡിപി യോഗം സ്ഥാപിക്കാന്‍ ഡോ. പല്‍പ്പുവും കുമാരനാശാനും ധര്‍മ്മസംഘം സ്ഥാപിക്കാന്‍ ബോധാനന്ദ സ്വാമിയും ധര്‍മ്മതീര്‍ത്ഥരും ശിവഗിരി തീര്‍ത്ഥാടനത്തിന് രൂപം നല്‍കാന്‍ വല്ലഭശ്ശേരി ഗോവിന്ദന്‍ വൈദ്യരും ടി.കെ. കിട്ടന്‍ റൈറ്ററും ഗുരുദേവന്റെ കൈകളിലെ ഉപകരണങ്ങള്‍ ആയി. സംഘടിച്ച് ശക്തരാകുവിന്‍ എന്ന വചനത്തിന്റ ആവിഷ്‌ക്കാരമാണ് ശിവഗിരി തീര്‍ത്ഥാടനം. സച്ചിദാനന്ദ സ്വാമി കൂട്ടിച്ചേര്‍ത്തു.
ധര്‍മസംഘം ട്രസ്റ്റ് ജനറല്‍ സെക്രട്ടറി സ്വാമി ശുഭാംഗാനന്ദ അധ്യക്ഷത വഹിച്ചു. ട്രഷറര്‍ സ്വാമി ശാരദാനന്ദ, തീര്‍ത്ഥാടന കമ്മറ്റി സെക്രട്ടറി സ്വാമി വിശാലാനന്ദ, മുനിസിപ്പല്‍ ചെയര്‍മാന്‍ കെ.എം. ലാജി, സ്വാമി വീരേശ്വരാനന്ദ, സ്വാമി ഗുരുപ്രകാശം, സ്വാമി ശിവനാരായണ തീര്‍ത്ഥ, സ്വാമി വിരജാനന്ദ ഗിരി, ബ്രഹ്മചാരി പ്രമോദ്, വണ്ടന്നൂര്‍ സന്തോഷ് തുടങ്ങിയവര്‍ പങ്കെടുത്തു.
പ്രതികരിക്കാൻ ഇവിടെ എഴുതുക: