ആലപ്പുഴ: ശബരിമല തീർത്ഥാടകർക്ക് നേരെ യുവാവിന്റെ ആക്രമണം. തീര്‍ത്ഥാടകര്‍ക്കൊപ്പം ഉണ്ടായിരുന്ന കുട്ടികള്‍ക്ക് പരിക്കേറ്റു. ഇന്നലെ രാത്രി പത്തുമണിയോടെ ആലപ്പുഴ കളര്‍കോട്ടാണ് സംഭവം നടന്നത്. കുട്ടികള്‍ ബൈക്കില്‍ ചാരിനിന്നത് ഇഷ്ടപ്പെടാത്തതാണ് യുവാവിന്റെ പ്രകോപനത്തിന് കാരണം. ആക്രമണത്തില്‍ ബസിന്റെ ചില്ല് തകരുകയും ചെയ്തു.
മലപ്പുറം നിലമ്പൂര്‍ സ്വദേശികളായ വിഷ്ണുവിന്റെ മകള്‍ അലീന, ബന്ധുവിന്റെ മകള്‍ വൃന്ദാവന എന്നിവര്‍ക്കാണ് പരിക്കേറ്റത്. അയ്യപ്പദര്‍ശനം കഴിഞ്ഞശേഷം നാട്ടിലേക്ക് മടങ്ങുന്നതിനിടെ ബൈപ്പാസ് റോഡിലെ ഹോട്ടലിന് മുന്നില്‍ ഭക്ഷണം കഴിക്കാനായി വാഹനം നിർത്തി. ഈ സമയം വാഹനത്തില്‍ നിന്നിറങ്ങിയ അലീനയും വൃന്ദാവനയും തൊട്ടടുത്ത് നിറുത്തിയിരുന്ന ബൈക്കില്‍ ചാരിനിന്നു. ഇത് ഇഷ്ടപ്പെടാത്ത യുവാവ് കുട്ടികളോട് കയര്‍ത്തു. ഇത് കുട്ടികള്‍ക്കൊപ്പമെത്തിയവര്‍ ചോദ്യംചെയ്തതോട‌െ കലികയറിയ യുവാവ് കൈയിലുണ്ടായിരുന്ന താക്കോല്‍ ഉപയോഗിച്ച്‌ കുട്ടികളെ കുത്തിപ്പരിക്കേല്‍പ്പിക്കുകയായിരുന്നു.
ഇപ്പോള്‍ കാണിച്ചുതരാമെന്നുപറഞ്ഞ് സ്ഥലത്തുനിന്ന് പോയ യുവാവ് ഒരു കൈക്കോടാലിയുമായി അല്പം കഴിഞ്ഞ് മടങ്ങിയെത്തുകയും ബസിന് നേരെ ആക്രമണം നടത്തുകയുമായിരുന്നു. ഇതിലാണ് ചില്ലുതകര്‍ന്നത്. ആക്രമണം നടത്തിയ യുവാവിനെക്കുറിച്ചുള്ള കൂടുതല്‍ വിവരങ്ങള്‍ ലഭ്യമായിട്ടില്ല. റിയാലിറ്റി ഷോ താരമായ യുവതിക്കൊപ്പമെത്തിയ യുവാവാണ് ആക്രമണം നടത്തിയതെന്ന് പോലീസിന് വിവരം ലഭിച്ചിട്ടുണ്ട്. ഇയാള്‍ക്കുവേണ്ടി അന്വേഷണം ആരംഭിച്ചു.
പ്രതികരിക്കാൻ ഇവിടെ എഴുതുക: