കൊച്ചി: തോല്‍വിയറിയാതെ തുടരെ ഏഴ് കളി പൂര്‍ത്തിയാക്കി. അതിനിടെ, ഒരു സമനില. കഴിഞ്ഞ കളിയില്‍ സമനില പൂട്ട് പൊളിച്ച് വീണ്ടും ജയം. ആ ജയ പരമ്പര തുടരാന്‍ കേരള ബ്ലാസ്റ്റേഴ്‌സ് ഇന്ന് വീണ്ടും കളത്തില്‍. എതിരാളികള്‍ ജംഷദ്പൂര്‍ എഫ്‌സി.
പതിനൊന്ന് കളിയില്‍ 22 പോയിന്റുമായി നാലാമതാണ് ബ്ലാസ്റ്റേഴ്‌സ്. ഇന്ന് ജയിച്ചാല്‍ ഒരു സ്ഥാനമുയരും. ആദ്യ കളി ജയിച്ച് തുടങ്ങി. പിന്നെ, മൂന്ന് തുടര്‍ തോല്‍വികള്‍. അതിനു ശേഷം താളം കണ്ടെത്തിയ മഞ്ഞപ്പട തോല്‍ക്കാതെ മുന്നേറുന്നു. ആകെ ഏഴ് കളി ജയിച്ചപ്പോള്‍, ഒരെണ്ണം സമനില.
അഡ്രിയാന്‍ ലൂണ, ഇവാന്‍ കല്യുഷ്‌നി, ദിമിത്രി ഡയമന്റക്കോസ്, കെ.പി. രാഹുല്‍, സഹല്‍ അബ്ദുള്‍ സമദ്, ജീക്‌സണ്‍ സിങ് തുടങ്ങിയവര്‍ മധ്യ, മുന്നേറ്റ നിരകളില്‍ താളം കണ്ടെത്തിയതോടെ മഞ്ഞപ്പടയുടെ പോരാട്ടവീര്യം വര്‍ധിച്ചു. ജെസെയ്ല്‍ കര്‍നെയ്‌റൊ, കഴിഞ്ഞ കളിയില്‍ വിജയ ഗോളടിച്ച സന്ദീപ് സിങ്, ഹോര്‍മിപാം, മാര്‍ക്കൊ ലെസ്‌കൊവിച്ച് എന്നിവര്‍ പ്രതിരോധത്തിനും കരുത്താകുന്നു.
ഒരു ജയം മാത്രമുള്ള ജംഷദ്പൂര്‍ അഞ്ചാമത്. തുടരെ നാലു തോല്‍വികള്‍ക്കു ശേഷം കഴിഞ്ഞ കളിയില്‍ കരുത്തരായ ഗോവയെ തളച്ചു. 13 മുഖാമുഖ പോരാട്ടങ്ങളില്‍ മൂന്ന് ജയം വീതം രണ്ട് ടീമുകള്‍ക്കും, ഏഴ് സമനില. ജംഷദ്പൂരിന്റെ ജയങ്ങളെല്ലാം സ്വന്തം മൈതാനത്ത്. ബ്ലാസ്റ്റേഴ്‌സ് ജയിച്ചത് എതിരാളികളുടെ തട്ടകത്തിലും. ഈ സീസണിലെ ആദ്യ പാദത്തില്‍ ജംഷദ്പൂരില്‍ എതിരില്ലാത്ത ഒരു ഗോളിന് മഞ്ഞപ്പട ജയിച്ചിരുന്നു. ഇഷാന്‍, പണ്ഡിത, ഡാനിയല്‍ ചിമ, ക്രിവെല്ലെറൊ തുടങ്ങിയവര്‍ ജംഷദ്പൂര്‍ നിരയില്‍.
പ്രതികരിക്കാൻ ഇവിടെ എഴുതുക: