നീണ്ട അരനൂറ്റാണ്ടു കാലം സ്വസമുദായത്തിനും, ഹൈന്ദവ നവോത്ഥാന പ്രവര്ത്തനങ്ങള്ക്കും ജീവിതം ഉഴിഞ്ഞുവച്ച പി.കെ. ഭാസ്കരന് എന്ന ഹൈന്ദവ സമൂഹ മുന്നണി പോരാളി ശബരീശ പദത്തില് വിലയംപ്രാപിച്ചു, ഹിന്ദു ഐക്യവേദി സംസ്ഥാന രക്ഷാധികാരി, വിശ്വഹിന്ദു പരിഷത് സംസ്ഥാന വൈസ് പ്രസിഡന്റ്, നാഷണല് ആദിവാസി ഫെഡറേഷന് ദേശീയ വൈസ് പ്രസിഡന്റ്എന്നീ ചുമതലകള് നിര്വഹിച്ചു വരവേയാണ് അദ്ദേഹത്തിന്റെ വിയോഗം സംഭവിച്ചത്.
കൊച്ചിന് പോര്ട്ട് ട്രസ്റ്റിന്റെ ഡപ്യൂട്ടി സെക്രട്ടറി എന്ന ഔദ്യോഗിക ചുമതല നിര്വഹിക്കുമ്പോള് തന്നെ താന് ജനിച്ചു വീണ മല അരയ സമൂഹത്തിന്റെ ഉന്നമനത്തിനായി ഐക്യ മലഅരയ സമുദായത്തിന് നേതൃത്വം കൊടുത്തു. അവരെ സമൂഹത്തിന്റെ മുഖ്യ ധാരയിലേക്ക് കൈപിടിച്ചുയര്ത്തി. പട്ടിക വര്ഗ സമൂഹത്തിന്റെ അവകാശങ്ങളും, അവര്ക്കു ലഭ്യമാകേണ്ട ആനുകൂല്യങ്ങളും സമുദായത്തില് നിന്ന് പരിവര്ത്തിതരായവര് തട്ടിയെടുക്കുന്നതിനെതിരെ പ്രക്ഷോഭങ്ങള്ക്കും, നിയമപോരാട്ടങ്ങള്ക്കും അദ്ദേഹം അന്ത്യനിമിഷം വരെയും അദ്ദേഹം മുന്നില് നിന്നു.
മലയരയ സമൂഹത്തിന്റെ മുന്നണി പോരാളിയും കാവലാളുമായിരുന്നു അദ്ദേഹം. അവരുടെ അവകാശ പോരാട്ടങ്ങളുടെ മുന്നില് ഭാസ്ക്കരേട്ടന് എന്നും ഉണ്ടായിരുന്നു. പൊന്നമ്പലമേട്ടില് തിരിതെളിയിക്കുവാനുള്ള അവകാശത്തിനായി അവസാന നിമിഷം വരെ പോരാടിയ വ്യക്തി. മല അരയസമൂഹ സംഘടനകളുടെ യോജിപ്പിനായും, പട്ടിക വര്ഗ സംഘടനകളുടെ ഐക്യത്തിനായും അഹോരാത്രം പ്രവര്ത്തിച്ചു. ഹിന്ദു ഐക്യപ്രവര്ത്തനങ്ങളുമായി അദ്ദേഹം രംഗത്തുവന്നത്, കുമ്മനം രാജശേഖരനെ നേരില് കണ്ട് സംസാരിക്കാന് കഴിഞ്ഞതിനു ശേഷമാണ്. വിഎച്ച്പി, ഹിന്ദുഐക്യവേദി പ്രവര്ത്തനവുമായി അദ്ദേഹം സഹകരിച്ചു പ്രവര്ത്തിച്ചു.
ശബരിമലയുടെ പൂജാകാര്യങ്ങളിലും, പൊന്നമ്പല മേട്ടില് ദീപം തെളിയിക്കുവാനും അവകാശമുണ്ടായിരുന്ന മല അരയ സമൂഹത്തെ ശബരിമല തീര്ത്ഥാടനത്തില് ഒരു ആചാര കാര്യങ്ങളിലും ഉള്പ്പെടുത്താത്തതില് പ്രതിഷേധിച്ച് മല അരയ സമൂഹത്തെ സമരമാര്ഗങ്ങളിലേക്ക് നയിക്കാനും അദ്ദേഹം പരിശ്രമിച്ചു, അദ്ദേഹത്തിന്റെ ശ്രമഫലമായി ശബരിമല തന്ത്രിയും, പന്തളം രാജാവും, ഹൈന്ദവ സംഘടനകളും ശബരിമല ആചാരങ്ങളിലും പൊന്നമ്പലമേട്ടില് പൂജാധികാരവും മലഅരയര്ക്കു നല്കണമെന്ന അവശ്യമുന്നയിച്ചു. പക്ഷേ, ആ ആഗ്രഹം പൂര്ത്തീകരിക്കാനാകാതെ ഈ തീര്ത്ഥാടന കാലത്തു തന്നെ ഭാസ്ക്കരേട്ടന് വിട വാങ്ങി.
ആദ്യ കാലം മുതല് എല്ലാ ഹിന്ദു നേതൃസമ്മേളനങ്ങളിലും അദ്ദേഹം നിറ സാന്നിദ്ധ്യമായി മാറി. മാത്രമല്ല ഏത് ഹിന്ദു സാമൂഹ്യ പ്രശ്നങ്ങളിലും പ്രക്ഷോഭങ്ങളിലും നേതൃനിരയിലും അദ്ദേഹമുണ്ടായിരുന്നു. പ്രായാധിക്യം കൊണ്ട് യാത്ര ചെയ്യാന് സാധിക്കാതെ വന്നതു മുതലാണ് സജീവ സംഘടനാ പ്രവര്ത്തനത്തില് ഇല്ലാതിരുന്നത്. വിശ്വഹിന്ദു പരിഷത്തും ഹിന്ദു ഐക്യവേദിയും അദ്ദേഹം നെഞ്ചോട് ചേര്ത്ത പ്രസ്ഥാനങ്ങളായിരുന്നു. കുമ്മനം രാജേട്ടനുമായുള്ള അദ്ദേഹത്തിന്റെ ബന്ധം ആഴത്തിലുള്ളതും ദൃഢവുമായിരുന്നു. സ്നേഹവും സൗമ്യതയും ശാന്തതയും കൈമുതലായ വ്യക്തിത്വമായിരുന്നു ഭാസ്ക്കരേട്ടന്. ഏതാണ്ട് ദക്ഷിണായനം അവസാനത്തെത്തി ഉത്തരായനത്തിലേക്ക് കടക്കാന് പോകുന്ന മുഹൂര്ത്തത്തില് ഭാസ്ക്കരന് അസ്തമിക്കുന്നു. അടുത്ത ജന്മത്തില് വീണ്ടും ഉദിച്ചുയരാന്. ഹൈന്ദവ നവോത്ഥാനത്തിന് നേതൃത്വം നല്കാന്…
ഇ.എസ് ബിജു
(ഹിന്ദു ഐക്യവേദി സംസ്ഥാന വക്താവ്)
