തിരുവനന്തപുരം : സംസ്ഥാനത്തെ ദുരൂഹ മരണങ്ങള് ഉള്പ്പടെയുള്ള സംഭവങ്ങളിലെല്ലാം ഡിഎന്എ പരിശോധന നടത്തണമെന്ന് നിര്ദ്ദേശവുമായി പോലീസ് മേധാവി അനില്കാന്ത്. ദുരൂഹതയുള്ള കേസുകളില് ഡിഎന്എ പരിശോധന നടത്തുന്നത് അന്വേഷണത്തിന് മുതല്ക്കൂട്ടാകുമെന്ന വിലയിരുത്തലിലാണ് ഈ നടപടി.
ഡിഎന്എ പരിശോധന നടത്താത്തത് ചില കേസുകളെ പ്രതികൂലമായി ബാധിച്ചിട്ടുണ്ട്. ഇതേക്കുറിച്ച് ക്രൈംബ്രാഞ്ച് മേധാവി നല്കിയ കത്തിന്റെ അടിസ്ഥാനത്തിലാണ് ഡിജിപി പുതിയ നിര്ദ്ദേശം നല്കിയിരിക്കുന്നത്. ലൈംഗികാതിക്രമ കേസുകളില് ആരോഗ്യപരിശോധനയും ദുരൂഹമരണങ്ങളിലും കൊലപാതകങ്ങളിലും മൃതദേഹപരിശോധനയും നടത്തുമ്പോള് അന്വേഷണ ഉദ്യോഗസ്ഥരുടെ ഭാഗത്തുനിന്ന് വീഴ്ചയുണ്ടാകുന്നുവെന്നാണ് ഇതില് ചൂണ്ടിക്കാട്ടുന്നത്.
കൊലപാതകം, അസ്വാഭാവിക മരണം, ബലാത്സംഗം എന്നിവയ്ക്കാണ് പുതിയ നിര്ദ്ദേശം ബാധകമാവുക. എല്ലാ സാംപിളുകളും ഡിഎന്എ പരിശോധനയ്ക്ക് വിടരുതെന്നും ആവശ്യമുള്ളവമാത്രം അയച്ചാല് മതിയെന്നുമായിരുന്നു നേരത്തെയുണ്ടായിരുന്ന ഉത്തരവ്.
എന്നാല് കുറ്റകൃത്യം നടന്ന സ്ഥലം പരിശോധിക്കുമ്പോള് കിട്ടുന്ന വസ്തുക്കള് ഡിഎന്എ പരിശോധനയ്ക്ക് അയക്കുകയോ ഇക്കാര്യം സയന്റിഫിക് ഓഫീസര്മാരോട് ആവശ്യപ്പെടുകയോ ചെയ്യാതിരിക്കുന്നത് അന്വേഷണ സംഘത്തിന്റെ ഭാഗത്തു നിന്നുള്ള വീഴ്ചയാണ്. പിന്നീട് പരിശോധനകള് ആവശ്യമായാല് സാംപിളുകള് ലഭ്യമാകാത്ത അവസ്ഥയും ചിലപ്പോള് ഉണ്ടാകും. ഇതൊക്കെ കേസന്വേഷണത്തെ ബാധിക്കും.
പരിശോധന നടത്തുമ്പോള് മറ്റു വസ്തുക്കളുടെ സാന്നിധ്യം ഇരയുടെ ശരീരത്തില്നിന്നോ മൃതദേഹത്തില്നിന്നോ കിട്ടിയാല് അന്വേഷണത്തിന്റെ ആദ്യഘട്ടത്തില്ത്തന്നെ ഡിഎന്എ പരിശോധനയ്ക്ക് അയക്കണം. കൂടാതെ സാംപിളുകള് തുടര്ന്നുള്ള പരിശോധനകള്ക്കായി സയന്റിഫിക് ഓഫീസര്ക്ക് കൈമാറാനും നിര്ദ്ദേശമുണ്ട്.
