ന്യൂദല്ഹി: ഗോവയില് നടന്ന അന്താരാഷ്ട്ര ചലച്ചിത്രോത്സവത്തില് കശ്മീരി പണ്ഡിറ്റുകളുടെ കൂട്ടക്കൊല പ്രതിപാദിക്കുന്ന വിവേക് അഗ്നിഹോത്രിയുടെ സൂപ്പര് ഹിറ്റ് ചിത്രം ‘ദി കശ്മീര് ഫയല്സിനെ ‘അശ്ലീല ചിത്രം’ എന്ന് വിശേഷിപ്പിച്ച ജൂറി ചെയര്മാനും ഇസ്രയേല് സംവിധായവകുമായി നദവ് ലാപിഡിനെ രൂക്ഷമായി വിര്ശിച്ച് ഇന്ത്യയിലെ ഇസ്രായേല് അംബാസഡര് നൗര് ഗിലോണ്. ട്വിറ്ററിലെ തുറന്നകത്തിലൂടെ ഇന്ത്യയോട് ഇസ്രയേല് മാപ്പപേക്ഷിച്ചു. ജൂറി ചെയര്മാനായുള്ള ഇന്ത്യന് ക്ഷണം ഏറ്റവും മോശമായ രീതിയില് ലാപിഡ് ദുരുപയോഗം ചെയ്തുവെന്ന് ഗിലോണ് പറഞ്ഞു.
‘ഇന്ത്യന് സംസ്കാരത്തില് അതിഥികള് ദൈവത്തെപ്പോലെയാണെന്ന് അവര് പറയുന്നു. ചലച്ചിത്രോത്സവത്തിലെ ജഡ്ജിമാരുടെ പാനല് അധ്യക്ഷനായുള്ള ഇന്ത്യന് ക്ഷണവും അവര് നിങ്ങള്ക്ക് നല്കിയ വിശ്വാസവും ആദരവും ഊഷ്മളമായ ആതിഥ്യവും നിങ്ങള് ഏറ്റവും മോശമായ രീതിയില് ദുരുപയോഗം ചെയ്തെന്നും ഗിലോണ്. ഞാന് ഒരു സിനിമാ വിദഗ്ദ്ധനല്ല, പക്ഷേ ചരിത്ര സംഭവങ്ങളെക്കുറിച്ച് ആഴത്തില് പഠിക്കുന്നതിനുമുമ്പ് സംസാരിക്കുന്നത് വിവേകശൂന്യവും ധാര്ഷ്ട്യവുമാണെന്ന് ലാപിഡ് മനസിലാക്കണം.
1990ല് കാശ്മീരി പണ്ഡിറ്റുകളെ കൊലപ്പെടുത്തുന്നതും കാശ്മീര് താഴ്വരയില് നിന്ന് പലായനം ചെയ്യുന്നതും സംബന്ധിച്ചാണ് ചിത്രം. ഇതു യാഥാര്ത്ഥ്യമാണെന്നും അതിന്റെ മുറിവുകള് ഇപ്പോഴും ഉണ്ടെന്നും മനസിലാക്കണമെന്നും ഗിലോണ്. ഇന്ത്യയിലെയും ഇസ്രായേലിലെയും ജനങ്ങളും രാജ്യങ്ങളും തമ്മിലുള്ള സൗഹൃദം വളരെ ശക്തമാണ്, നിങ്ങള് ആ ബന്ധത്തെ ആണ് നശിപ്പിക്കാന് ശ്രമിക്കുന്നത്. മനുഷ്യനെന്ന നിലയില് എനിക്ക് ലജ്ജ തോന്നുന്നു, ഞങ്ങളുടെ ആതിഥേയരുടെ ഔദാര്യത്തിനും സൗഹൃദത്തിനും പ്രതിഫലം നല്കിയ മോശമായ രീതിക്ക് അവരോട് ഞാന് ക്ഷമ ചോദിക്കുന്നെന്നും ഗിലോണ് ട്വീറ്റില് വ്യക്തമാക്കി.
53ാമത് രാജ്യാന്തര ചലച്ചിത്ര മേളയുടെ സമാപന സമ്മേളനത്തിലാണ് ലാപിഡ് പരസ്യ വിമര്ശനം ഉന്നയിച്ചത്.”രാജ്യാന്തര സിനിമാ വിഭാഗത്തില് 15 സിനിമകളാണ് ഉണ്ടായിരുന്നത്. അതില് 14 സിനിമകളും മികച്ച നിലവാരം പുലര്ത്തിയവയും ചലച്ചിത്രമൂല്യം നിറഞ്ഞതുമായിരുന്നു. അതു വലിയ തോതില് ചര്ച്ചയ്ക്കും വഴിവച്ചു. എന്നാല് 15ാമത്തെ സിനിമ കണ്ടാണ് ഞങ്ങളെല്ലാവരും ഞെട്ടിയതും അസ്വസ്ഥരായതും ദി കശ്മീര് ഫയല്സ്. ഇത്തരത്തില് അഭിമാനകരമായ ഒരു ചലച്ചിത്രോത്സവത്തിന്റെ മത്സര വിഭാഗത്തില് അനുചിതമായ ഒരു അപരിഷ്കൃത സിനിമയായി തോന്നി- അദ്ദേഹം പറഞ്ഞു. കേന്ദ്രമന്ത്രി അനുരാഗ് താക്കൂര് ഉള്പ്പെടെയുള്ള മന്ത്രിമാര് പങ്കെടുത്ത ചടങ്ങിലായിരുന്നു ലാപിഡിന്റെ പരാമര്ശം. ഇത് വലിയ വിവാദമായതിനു പിന്നാലെയാണ് ലാപിഡിനെ രൂക്ഷമായി വിമര്ശിച്ചും ഇന്ത്യയോട് ക്ഷമാപണം നടത്തിയും ഇസ്രയേല് അംബാസഡര് രംഗത്തെത്തിയത്.
