ന്യൂദല്ഹി: ഒരേ ഒരു ഉഷ എന്നതാണ് ഉഷയെക്കുറിച്ച് എഴുതപ്പെട്ട ഒരു പുസ്തകത്തിന്റെ പേര്. ഒരു വനിതാ അത്ലറ്റ് എന്ന നിലയില് ഒട്ടേറെ റെക്കോഡുകള് ആദ്യമായി തകര്ത്തും സ്വന്തം പേരില് എഴുതിച്ചേര്ത്തും തിളങ്ങുന്ന നാമമാണ് ഉഷ.
സജീവ് അത്ലറ്റിക്സില് നിന്നും പിരിഞ്ഞുപോന്ന ശേഷം, അധികം ശ്രദ്ധിക്കപ്പെടാതെ ഒരു കോച്ചിംഗ് സെന്ററും റെയില്വേ ജോലിയുമായി ഒതുങ്ങിക്കഴിയുന്ന ഉഷയെ മോദിയുടെ നേതൃത്വത്തിലുള്ള സംഘമാണ് കണ്ടെത്തിയത്. പിന്നീട് രാജ്യസഭാംഗമാക്കി. ഉഷയുടെ ഉള്ളില് ഉറങ്ങിക്കിടക്കുന്ന സംഘാടനശേഷിയും ഇന്ത്യന് കായികരംഗത്തെ ലോകത്തിന്റെ നെറുകെയില് എത്തിക്കാനുള്ള അഭിവാഞ്ഛയും കോര്ത്തിണക്കാന് പറ്റിയ പദവിയായിരിക്കും ഇന്ത്യന് ഒളിമ്പിക് അസോസിയേഷന് പ്രസിഡന്റ് പദവി.
ജയിച്ചാല് കേരളത്തില് നിന്നും ആദ്യ ഐഒഎ പ്രസിഡന്റായി വീണ്ടും ഉഷ ചരിത്രത്താളുകളില് സ്ഥാനം പിടിക്കും. .
കായിക രംഗത്ത് ശക്തമായ അധികാരസ്ഥാനമായ ഇന്ത്യന് ഒളിമ്പിക് അസോസിയേഷന് പ്രസിഡന്റ് സ്ഥാനം സാധാരണ വലിയ രാഷ്ട്രീയ പിടിപാടുകളോ വന്ബിസിനസ് ഹൗസുകളുടെ പിന്തുണയോ ഉള്ളവര്ക്കേ ലഭിക്കാറുള്ളൂ. കോണ്ഗ്രസിന്റെ സുരേഷ് കല്മാഡി ആ പദവിയില് എത്തിയത് അങ്ങിനെയാണ്. എന്നാല് ദല്ഹിയില് നടത്തിയ ഒളിമ്പ്യാഡില് സ്റ്റേഡിയം നിര്മ്മാണത്തിലും മറ്റും കോടികളുടെ അഴിമതി നടത്തി സുരേഷ് കല്മാഡി കുപ്രസിദ്ധി നേടുകയും അന്ന് ദല്ഹി മുഖ്യമന്ത്രിയായ ഷീ ദീക്ഷിതിന് എന്നെന്നേക്കുമായി പേര് നഷ്ടപ്പെടാനും ഇടയാക്കി.
അതുപോലെ തമിഴ്നാട്ടിലെ നാരായണ് രാമചന്ദ്രന് ഇന്ത്യന് ഒളിമ്പിക് അസോസിയേഷന് പ്രസിഡന്റായത് സിമന്റ് വ്യവസായിയും ചെന്നൈ കിംഗ്സ് ഉടമയും മുന് ബിസിസി ഐ പ്രസിഡന്റുമായ എന്. ശ്രീനിവാസന്റെ സഹോദരന് എന്ന നിലയില് കൂടി ലഭിച്ച പിന്തുണയോടെയാണ്. ഇതൊന്നുമില്ലാതെയാണ് ഉഷ എത്തുന്നത്. അത് ലറ്റ് എന്ന നിലയില് നടത്തിയ പ്രകടനങ്ങളുടെ മെറിറ്റോടെ.
ഉഷ തന്നെയാണ് മത്സരിക്കുന്ന വിവരം ഫേസ്ബുക്കിലൂടെ അറിയിച്ചത്. അതോടെ ഫേസ്ബുക്ക് പേജില് സന്ദേശങ്ങളുടെ പ്രവാഹമാണ്. ഏകദേശം 376 സന്ദേശങ്ങള് ഉടനെയെത്തി. ഒട്ടേറെ പേര് ഷെയര് ചെയ്തിട്ടുമുണ്ട്. അത്ലറ്റുകളുടെയും നാഷണല് ഫെഡറേഷനുകളുടെയും പിന്തുണയോടെയാണ് മത്സരിക്കുന്നതെന്നും പി.ടി.ഉഷ എടുത്തുപറഞ്ഞതിനര്ത്ഥം വേണ്ടത്ര പിന്തുണ ഉറപ്പാക്കിയായിരിക്കും മത്സരമെന്നതാണ്. ഡിസംബര് 10നാണ് തെരഞ്ഞെടുപ്പ്.
