തൃപ്രയാര്: നാട്ടിക ഈസ്റ്റ് യുപി സ്കൂളില് മോഷ്ടാക്കളുടെ വിളയാട്ടം. ക്ലാസ് മുറികളിലെ മേശകള് നശിപ്പിച്ചതിന് പുറമേ ഓഫീസ് റൂമിന്റെ പൂട്ട് തകര്ത്ത് അകത്തു കടക്കുകയും ഫയലുകള് വാരിവലിച്ചിട്ടു നശിപ്പിക്കുകയും ചെയ്തു. കുട്ടികളില് നിന്ന് വിവിധ ഫണ്ടുകകളിലായി സ്വരൂപിച്ചിരുന്ന 5000 രൂപയിലധികം നഷ്ടപ്പെട്ടു.
തിങ്കളാഴ്ച രാവിലെ അധ്യാപകര് സ്കൂളിലെത്തിയപ്പോഴാണ് മോഷണ വിവരമറിയുന്നത്. ഓഫീസിന്റെ വാതിലുകള് കുത്തി തുറന്ന നിലയിലാണ്. ഓഫീസ് മുറി, സ്റ്റാഫ് മുറി, ക്ലാസ് മുറികളിലെ മേശകള്, അലമാരികള് എന്നിവ കുത്തിത്തുറന്നിട്ടുണ്ട്.
ഓഫീസ് റൂമില് സൂക്ഷിച്ചിരുന്ന പണവും റൂറല് ബാങ്കിലെ ഫിക്സഡ് ഡെപ്പോസിറ്റ് റെസീപ്റ്റും നഷ്ടപ്പെട്ടു. സ്കൂളിലെ കമ്പ്യൂട്ടറുകളും അനുബന്ധ ഉപകരണങ്ങളും മോഷ്ടാക്കള് നശിപ്പിച്ചിട്ടുണ്ട്. സ്കൂള് അധികൃതര് പോലീസിനെ വിവരമറിയിച്ചതിനെ തുടര്ന്ന് വലപ്പാട് പോലീസ് സ്ഥലത്തെത്തി അന്വേഷണം ആരംഭിച്ചിട്ടുണ്ട്.
