ദോഹ: ലയണല് മെസി-ക്രിസ്റ്റ്യാനൊ റൊണാള്ഡൊ ചിത്രമാണ് ലോകകപ്പ് ദിനം ലോകമാകെ തരംഗമായത്. മെസിയും ക്രിസ്റ്റ്യാനൊയും ഒരു ചെസ് ബോര്ഡിന് ഇരുപുറവുമിരുന്ന് ചെസ് കളിക്കുന്ന ഈ ചിത്രം ഇന്നലെ സമൂഹമാധ്യമങ്ങളിലെ പല റിക്കാര്ഡുകളും തകര്ത്തു. കോടിക്കണക്കിനുപേരാണ് ഈ ചിത്രത്തിലൂടെ കടന്നുപോയത്.
ബാഗ്, ഷൂസ് നിര്മാതാക്കളായ ലൂയിസ് വ്യൂട്ടണിനായി അമേരിക്കന് പോര്ട്രെയ്റ്റ് ഫോട്ടോഗ്രാഫര് ആനി ലെയ്ബോവിറ്റ്സാണ് ഈ ചിത്രം പകര്ത്തിയത്. മെസിയും ക്രിസ്റ്റ്യാനൊയും തങ്ങളുടെ സമൂഹമാധ്യമ അക്കൗണ്ടുകളിലൂടെ ഒരേ സമയം ഈ ചിത്രം പുറത്തുവിട്ടു. ഫുട്ബോളിലെ ഇതിഹാസങ്ങളെ ഒപ്പം കണ്ടതിന്റെ ആവേശത്തില് കായികപ്രേമികള് ലോകകപ്പ് ആവേശത്തിലേക്ക് ചുവടുവച്ചു.
