കൊല്ലം: മഴയിൽ ബൈക്കില് സഞ്ചരിച്ച് സോപ്പുതേച്ച് കുളിച്ച യുവാക്കള് പോലീസ് പിടിയില്. സിനിമാപറമ്പ് സ്വദേശികളായ അജ്മല്, ബാദുഷ എന്നിവര്ക്കെതിരെയാണ് പോലീസ് നടപടി. കൊല്ലം ജില്ലയിലെ ശാസ്താംകോട്ട, ഭരണിക്കാവിലാണ് സംഭവം. നാല് ദിവസം മുമ്പായിരുന്നു സംഭവം എന്നാണ് വിവരം. കഴിഞ്ഞ ദിവസമാണ് ഇതിന്റെ ദൃശ്യങ്ങൾ സമൂഹമാദ്ധ്യമങ്ങളിലൂടെ പുറത്തുവന്നത്.
രാത്രിയിൽ കനത്ത മഴക്കിടെ തിരക്കേറിയ ഭരണിക്കാവ് ടൗണിലൂടെയാണ് ഇവർ ദേഹത്ത് സോപ്പ് തേച്ച് അർദ്ധ നഗ്നരായി ബൈക്കോടിച്ചത്. ഇതിന്റെ ദൃശ്യങ്ങൾ സമൂഹമാധ്യമങ്ങളിൽ വൈറലാവുകയും ചെയ്തു. കളി കഴിഞ്ഞ് മടങ്ങുന്നതിനിടെ മഴ പെയ്തപ്പോൾ നനഞ്ഞ ടീഷർട്ട് അഴിച്ച് കുളിച്ചതാണെന്നും ഇത്രയും പ്രശ്നമാകുമെന്ന് കരുതിയില്ലെന്നും യുവാക്കൾ പറയുന്നു.
ദൃശ്യങ്ങള് അതിവേഗം സോഷ്യല് മീഡിയയില് വൈറലായതോടെ നഗരത്തിലെ കുളി സഞ്ചാരം കാര്യമായെടുക്കാന് പോലീസ് തീരുമാനിച്ചു. സോപ്പ് പതപ്പിച്ച് നടന്നവരെ പോലീസ് പൊക്കി. അപകടകരമായ രീതിയില് ബൈക്ക് ഓടിച്ചത് ഉള്പ്പെടെയുള്ള വകുപ്പുകള് ചുമത്തി കേസ് എടുത്തു. പിഴയും അടപ്പിച്ചു.
