ന്യൂദല്ഹി : അന്തരീക്ഷ മലിനീകരണം രൂക്ഷമായതോടെ ദല്ഹിയില് ഡീസലില് പ്രവര്ത്തിക്കുന്ന വാഹനങ്ങള്ക്ക് നിയന്ത്രണം. മലിനീകരണം രൂക്ഷമായതോടെയാണ് ഈ നടപടി. എയര് ക്വാളിറ്റി ഇന്ഡക്സ് 700 കടന്നുവെന്ന റിപ്പോര്ട്ടിനെ തുടര്ന്ന് ഈ വിഷയത്തില് സുപ്രീം കോടതിയുടേയും ഇടപെടല് ഉണ്ടായിട്ടുണ്ട്.
പുതിയ നിര്ദേശ പ്രകാരം ഡീസലില് പ്രവര്ത്തിക്കുന്ന എസ്യുവികള്, വാണിജ്യ വാഹനങ്ങള് എന്നിവ ഉള്പ്പെടുന്ന ഡീസല് ലൈറ്റ് മോട്ടോര് വാഹനങ്ങള്ക്കും നിരോധനം ഏര്പ്പെടുത്തും. കേന്ദ്ര സര്ക്കാരിന്റെ എയര് ക്വാളിറ്റി മന്ത്രിലയത്തിന്റേതാണ് ഡീസല് വാഹനങ്ങള് നിരോധിച്ചുള്ള നിര്ദേശം. ഇത് കൂടാതെ ദല്ഹിയില് പ്രാബല്യത്തില് വരുത്തിയിരുന്ന ഒറ്റ- ഇരട്ട അക്ക നമ്പര് വാഹനങ്ങള് നിയന്ത്രണം തിരിച്ചുകൊണ്ടുവരുന്നതും ആലോചനയിലാണ്. ഈ വിഷയത്തില് സംസ്ഥാനങ്ങളുമായി കേന്ദ്രം ചര്ച്ച നടത്തിയശേഷം നടപടി സ്വീകരിക്കും.
ദല്ഹിയിലും തലസ്ഥാന മേഖലയിലെ മറ്റു നഗരങ്ങളിലുമാണ് നിലവില് നിയന്ത്രണം ഏര്പ്പെടുത്താന് നിര്ദ്ദേശിച്ചിരിക്കുന്നത്. ബിഎസ് 3, ബിഎസ് 4 എമിഷന് സ്റ്റാന്റേഡിലുള്ള വാഹനങ്ങള്ക്കാണ് നിലവില് നിരോധനം ബാധകമാകുക. ബിഎസ്- 6 നിലവാരത്തിലുള്ള ഡീസല് വാഹനങ്ങള്ക്ക് തുടര്ന്നും നിരത്തുകളില് ഇറക്കാം. സിഎന്ജിയില് ഓടുന്ന വാഹനങ്ങളെയും അവശ്യ സര്വീസുകള്ക്കായി ഉപയോഗിക്കുന്ന വാഹനങ്ങള്ക്കും ഈ നിരോധനം ബാധകമാകില്ല. ഈ നിരോധനം ദല്ഹി പരിധിയില് ഉള്ളവയ്ക്കും അതിര്ത്തി സംസ്ഥാനങ്ങളില് നിന്നെത്തുന്ന വാഹനങ്ങള്ക്കും ബാധകമാണ്.
വായുമലിനീകരണം കുറച്ചുകൊണ്ടുവരുന്നതിനുള്ള കര്മപദ്ധതിയുടെ അവസാനഘട്ടമെന്ന നിലയിലാണ് പുതിയ തീരുമാനം.വിദ്യാഭ്യാസ സ്ഥാപനങ്ങളുടെയും അത്യാവശ്യമല്ലാത്ത വാണിജ്യ സ്ഥാപനങ്ങളുടെയും പ്രവര്ത്തനം നിര്ത്തിവെയ്ക്കാനും ഒറ്റയക്ക-ഇരട്ടയക്ക നമ്പറുകളുടെ അടിസ്ഥാനത്തില് വാഹനഗതാഗതം നിയന്ത്രിക്കാനും കമ്മീഷന് ആവശ്യപ്പെട്ടിട്ടുണ്ട്.
