കരിപ്പൂരിൽ സ്വർണവേട്ട; യാത്രക്കാരൻ കടത്താൻ ശ്രമിച്ചത് ഒരു കിലോയിലധികം സ്വർണം, സ്വർണം ഒളിപ്പിച്ചിരുന്നത് മലദ്വാരത്തിൽ

കരിപ്പൂർ: കോഴിക്കോട് വിമാനത്താവളം വഴി കടത്തുകയായിരുന്ന ഒരു കിലോയിലധികം സ്വർണം പോലീസ് പിടികൂടി. ബഹ്‌റൈനിൽ നിന്നും എത്തിയ കോഴിക്കോട് കുണ്ടുങ്ങൽ സ്വദേശി മുഹമ്മദ് ജനീസിനെ(41) അറസ്റ്റ് ചെയ്തു.  മലദ്വാരത്തിൽ 1.007 കിലോഗ്രാം സ്വർണമിശ്രിത രൂപത്തിലാക്കി നാല് കാപ്സ്യൂളുകളായി ഒളിപ്പിച്ച് കടത്താനാണ് ശ്രമിച്ചത്.  

ആഭ്യന്തര വിപണിയിൽ 52 ലക്ഷം രൂപ വില വരുന്ന സ്വർണ്ണമാണ് പിടികൂടിയത്. വ്യാഴാഴ്ച ബഹ്റൈനിൽ നിന്നെത്തിയ എയർ ഇന്ത്യ എക്സ്പ്രസ്സ് വിമാനത്തിലാണ് ജനീസ് കരിപ്പൂർ എയർപോർട്ടിലിറങ്ങിയത്.  കസ്റ്റംസ് പരിശോധനയ്‌ക്ക് ശേഷം വിമാനത്താവളത്തിന്‌ പുറത്തിറങ്ങിയ ജനീസിനെ പോലീസ് നിരീക്ഷിക്കുന്നുണ്ടായിരുന്നു.  

എയർപോർട്ട് പരിസരത്ത് തങ്ങിയ ജനീസ് സുഹൃത്തുക്കളോടൊപ്പം കാറിൽ പുറത്തേക്ക് പോകും വഴിയാണ് പോലീസ് ഇയാളെ കസ്റ്റഡിയിലെടുത്തത്.