ന്യൂദല്‍ഹി: ചലച്ചിത്ര സംവിധായകന്‍ സാജിദ് ഖാനെ ബിഗ് ബോസില്‍ നിന്നും പുറത്താക്കണമെന്ന് ആവശ്യപ്പെട്ട ദല്‍ഹി വനിതാ കമ്മീഷന്‍ അധ്യക്ഷ സ്വാതി മാലിവാളിന്റെ വീടിന് നേരെ ആക്രമണം. കാറുകള്‍ തല്ലിത്തകര്‍ക്കുകയും ചെയ്തു. ആക്രമണ സമയത്ത് സ്വാതിയും അമ്മയും വീട്ടില്‍ ഉണ്ടായിരുന്നില്ല. സ്വാതിയുടെയും അമ്മയുടെയും കാറുകളുടെ ചില്ലുകളും ഡോറുകളും തകര്‍ത്തു. അക്രമിയെ തിരിച്ചറിയാന്‍ കഴിഞ്ഞിട്ടില്ല.
സാജിദ് ഖാനെ ബിഗ് ബോസില്‍ നിന്നും പുറത്താക്കണമെന്ന് ആവശ്യപ്പെട്ട് ദല്‍ഹി വനിത കമ്മീഷന്‍ അധ്യക്ഷ സ്വാതി മാലിവാള്‍ കേന്ദ്ര വാര്‍ത്താവിതരണമന്ത്രി അനുരാഗ് താക്കൂറിന് കത്തെഴുതിയിരുന്നു. ഇതിന് പിന്നാലെയാണ് സ്വാതി മാലിവാളിന് ബലാത്സംഗ ഭീഷണികള്‍ വന്ന് തുടങ്ങിയത്. ഇന്‍സ്റ്റഗ്രാമിലൂടെയായിരുന്നു ബലാത്സംഗ ഭീഷണി ഉയര്‍ന്നത്. തനിക്കെതിരെ ബലാത്സംഗ ഭീഷണി ഉയര്‍ത്തിയവരെ ഉടന്‍ അറസ്റ്റ് ചെയ്യണമെന്നും കഴിഞ്ഞ ദിവസം സ്വാതി മാലിവാള്‍ വാര്‍ത്താസമ്മേളനത്തില്‍ ആവശ്യപ്പെട്ടിരുന്നു.
നിരവധി യുവനടിമാരും മോഡലുകളും തങ്ങളെ ലൈംഗികമായി സാജിദ് ഖാന് ചൂഷണം ചെയ്തതായി ആരോപണം ഉയര്‍ത്തിയ സാഹചര്യത്തിലാണ് സ്വാതി മാലിവാള്‍ ബിഗ് ബോസില്‍ നിന്നും സാജിദ് ഖാനെ പുറത്താക്കണമെന്ന് ആവശ്യപ്പെട്ടത്.
പ്രമുഖ സംവിധായിക ഫാറാ ഖാന്റെ ഇളയ സഹോദരനാണ് സാജിദ് ഖാന്. ബോളിവുഡിലെ സല്‍മാന്‍ ഖാന്, ഷാറൂഖ് ഖാന് എന്നിങ്ങനെയുള്ള കരുത്തരുമായി അടുത്ത ബന്ധമുള്ളവരാണ് ഫാറാ ഖാനും സാജിദ് ഖാനും. ആരും ചോദ്യം ചെയ്യാത്ത സാജിദ് ഖാന്റെ ആധിപത്യം ചോദ്യം ചെയ്തതാണ് പ്രകോപനത്തിന് കാരണമെന്ന് കരുതുന്നു.
സല്‍മാന്‍ഖാന്‍ അവതരിപ്പിക്കുന്ന ഹിന്ദി ബിഗ് ബോസിസിന്റെ 16ാമത് എഡിഷനില്‍ സാജിദ് ഖാനും മത്സരിക്കുന്നുണ്ട്. അതോടെയാണ് ലൈംഗിക പീഡന പരാതികള്‍ സാജിദ് ഖാനെതിരെ ഉയരാന്‍ തുടങ്ങിയത്.
ബിഗ് ബോസ് പോലെ ഒരു ഷോവില്‍ ലൈംഗിക വേട്ടക്കാരെ ഉള്‍പ്പെടുത്തുന്നത് ശരിയല്ലെന്നും 10 ലൈംഗിക പീഡന പരാതികള്‍ ലഭിച്ചിട്ടുണ്ടെന്നും സ്വാതി മാലിവാള്‍ വാര്‍ത്താസമ്മേളനത്തില്‍ പരസ്യമായി ആവശ്യപ്പെട്ടിരുന്നു.
തന്റെ ബ്രായുടെ അളവ് സാജിദ് ഖാന് ചോദിച്ചു എന്നാണ് ബോജ്പുരി താരം സ്വാതി ചാറ്റര്‍ജിയുടെ പരാതി. സാജിദ് ഖാന് തന്റെ സ്വകാര്യഭാഗങ്ങള്‍ പ്രദര്‍ശിപ്പിച്ച ശേഷം അതിന് പൂജ്യം മുതല്‍ 10 വരെ റേറ്റിംഗ് കൊടുക്കാന്‍ ആവശ്യപ്പെട്ടുവെന്നാണ് യുവനടി ഷെര്‍ളിന്‍ ചോപ്ര ഈയിടെ ആരോപിച്ചത്. ഇറാനില്‍ നിന്നും ബോളിവുഡിലെത്തിയ മന്ദന കരിമിയും സാജിദ് ഖാനെതിരെ ലൈംഗിക പീഢന പരാതി ഉയര്‍ത്തിയിരുന്നു. 17 വയസ്സായ ഒരു നടിയോട് വസ്ത്രങ്ങള്‍ അഴിച്ചുമാറ്റി മികച്ച ശരീരഘടനയാണെങ്കില്‍ റോള്‍ തരാമെന്ന് സാജിദ് ഖാന് പറഞ്ഞതായി ആരോപണമുണ്ട്. ലൈംഗിക പീഢനം ഉള്‍പ്പെടെ ഒട്ടേറെ യുവനടിമാരും മോഡലുകളും സാജിദ് ഖാനെതിരെ മിടൂ ആരോപണങ്ങള്‍ ഉന്നയിച്ചിട്ടുണ്ട്. ബിഗ് ബോസില്‍ സാജിദ് ഖാനെ ഉള്‍പ്പെടുത്തിയതിന്റെ പേരില്‍ കളേഴ്സ് ടിവിയും വെട്ടിലായിരിക്കുകയാണ്.
പ്രതികരിക്കാൻ ഇവിടെ എഴുതുക: