തിരുവനന്തപുരം: ജനസംഖ്യാ വര്ദ്ധനവ് കണക്കാക്കുന്നത് ‘ടോട്ടല് ഫെര്ട്ടിലിറ്റി റേറ്റി’നെ ബന്ധപ്പെടുത്തിയാണെന്നും അതുപ്രകാരം മുസ്ളീം ജനസംഖ്യയാണ് രാജ്യത്ത് കുറയുന്നതെന്ന് മുഖ്യമന്ത്രി പിണറായി വിജയന്. കഴിഞ്ഞ ഇരുപത് വര്ഷത്തിനിടെ രാജ്യത്തെ മറ്റ് മതങ്ങളെ അപേക്ഷിച്ച് മുസ്ലിം സമുദായത്തിലെ ടോട്ടല് ഫെര്ട്ടിലിറ്റി റേറ്റ് കുറയുന്നതായാണ് കേന്ദ്രസര്ക്കാരിന്റെ ആരോഗ്യ മന്ത്രാലയം പുറത്തുവിട്ട ദേശീയ കുടുംബാരോഗ്യ സര്വ്വേ യുടെ കണക്കുകള് സൂചിപ്പിക്കുന്നത്. രാജ്യത്തെ ജനസംഖ്യയില് മതാടിസ്ഥാനത്തില് അസന്തുലിതാവസ്ഥ നിലനില്ക്കുന്നുവെന്ന ആര്എസ്എസ് സര്സംഘചാലകന്റെ പ്രസ്താവനയോടുള്ള പ്രതികരണമായി മുഖ്യമന്ത്രി പറഞ്ഞു.
സര്വ്വേ പ്രകാരം ഹിന്ദു, മുസ്ലിം സമുദായങ്ങളിലെ ടോട്ടല് ഫെര്ട്ടിലിറ്റി റേറ്റ് യഥാക്രമം 1.9 ഉം 2.3 ഉം ആണ്. വ്യത്യാസം വെറും 0.4 മാത്രമാണ്. മുസ്ലിം സമുദായത്തിലെ ടോട്ടല് ഫെര്ട്ടിലിറ്റി റേറ്റ് 20151-6 ല് 2.6 ആയിരുന്നത് 2019-21 ല് 2.3 ആയി കുറഞ്ഞു. 1992-93 ല് ഇത് 4.4 ആയിരുന്നു. ഇരുപതുവര്ഷങ്ങള്ക്കിടെ ഫെര്ട്ടിലിറ്റി നിരക്കിന്റെ കാര്യത്തില് 41.2 ശതമാനത്തിന്റെ കുറവാണ് ഹിന്ദു സമുദായത്തിലുണ്ടായതെങ്കില് മുസ്ലിങ്ങള്ക്കിടയില് 46.5 ശതമാനമാണ് കുറവുണ്ടായത്.
സെന്സസ് കണക്കു പ്രകാരം ഹിന്ദു ജനസംഖ്യാ വര്ദ്ധനവില് 3.1 ശതമാനത്തിന്റെ ഇടിവാണ് സംഭവിച്ചത്. എന്നാല് മുസ്ലിം ജനസംഖ്യാ വര്ദ്ധനവില് 4.7 ശതമാനം ഇടിവാണ് ഉണ്ടായത്. പിണറായി വിജയന് കണക്ക് നിരത്തി. ഹിന്ദുക്കള് സമീപ ഭാവിയില് ന്യൂനപക്ഷമായി മാറുമെന്ന നുണ സംഘപരിവാര് വര്ഷങ്ങളായി പ്രചരിപ്പിക്കുകയാണെന്നും പിണറായി ആരോപിച്ചു
