കോഴിക്കോട് : കോഴിക്കോട് സിനിമാ പ്രമോഷന് പ്രോഗ്രാമിനിടെ നടിമാര്‍ക്ക് നേരെ ലൈംഗീകാതിക്രമം ഉണ്ടായതില്‍ പോലീസ് അന്വേഷണം തുടങ്ങി. കോഴിക്കോട് സ്വകാര്യമാളിലെ പ്രോഗ്രാമിനുശേഷം പുറത്തേയ്‌ക്കിറങ്ങുന്നതിനിടെയാണ് നടിമാര്‍ക്ക് നേരെ ആക്രമണമുണ്ടായത്. പ്രമോഷന് പരിപാടിക്ക് ശേഷം നടിമാരില്‍ ഒരാള്‍ സമൂഹ മാധ്യമത്തിലൂടെ ഇക്കാര്യം പങ്കുവെച്ചതോടെയാണ് സംഭവം പുറത്തുവന്നത്.
സംഭവവുമായി ബന്ധപ്പെട്ട് സിറ്റി പോലീസ് കമ്മിഷണറുടെ നേതൃത്വത്തില്‍ മാളിലെ സിസിടിവി ദൃശ്യങ്ങള്‍ പരിശോധിച്ചു വരികയാണ്. ഒരു നടി ലൈംഗികാതിക്രമത്തിനിടെ പ്രതികരിക്കുന്നത് സംബന്ധിച്ച ചിത്രങ്ങള്‍ മാധ്യമങ്ങളില്‍ പ്രചരിക്കുന്നുണ്ട്. പ്രോഗ്രാമിന് ശേഷം സിനിമാ നിര്‍മാതാവും പരാതി നല്‍കിയതോടെയാണ് പോലീസ് കേസെടുത്ത് അന്വേഷണം ആരംഭിച്ചത്.
സിനിമാ പ്രമോഷന് ശേഷം നടിമാരില്‍ ഒരാള്‍ കൊച്ചിയിലേക്കും മറ്റൊരാള്‍ കണ്ണൂരിലേക്കുമാണ് പോയത്. അതിനാല്‍ ഇരുവരുടേയും മൊഴി രേഖപ്പെടുത്തുന്നതിനായി വനിത പോലീസ് പുറപ്പെട്ടിട്ടുണ്ട്. ഇവരുടെ മൊഴി പരിശോധിച്ച ശേഷം തുടര്‍ നടപടി സ്വീകരിക്കും. എന്നാല്‍ അക്രമികളെ കുറിച്ചുള്ള വിവരം പോലീസിന് ലഭിച്ചെന്നാണ് സൂചന. അതേസമയം മാളില്‍ സുരക്ഷാ വീഴ്ചയുണ്ടായോ എന്നും പോലീസ് പരിശോധിക്കും.
പ്രതികരിക്കാൻ ഇവിടെ എഴുതുക: