തിരുവനന്തപുരം : വിഴിഞ്ഞത്ത് തുറമുഖ നിര്മാണത്തിനെതിരെ പ്രതിഷേധിക്കുന്നവരുമായി കൂടിക്കാഴ്ച നടത്തി ഗവര്ണര് ആരിഫ് മുഹമ്മദ് ഖാന്. വിഴിഞ്ഞം പ്രശ്നം കേന്ദ്ര സര്ക്കാരിന്റെ ശ്രദ്ധയില് കൊണ്ടുവരുമെന്നും ഗവര്ണര് അറിയിച്ചു. സമരത്തിന് നേതൃത്വം നല്കുന്ന ലത്തീന് സഭാ അധികൃതരുമായി നടത്തിയ കൂടിക്കാഴ്ചയിലാണ് ഇക്കാര്യം അറിയിച്ചത്.
ദല്ഹി സന്ദര്ശനത്തിന് മുന്നോടിയായാണ് സമര സമിതി പ്രവര്ത്തകരെ രാജ്ഭവനില് വിളിച്ചു വരുത്തി ഗവര്ണര് വിശദാംശങ്ങള് തേടിയത്. വിഷയത്തില് ഇടപെടണമെന്ന് സമര സമിതി നേതാക്കള് ഗവര്ണറോട് ആവശ്യപ്പെട്ടിട്ടുണ്ട്. പ്രശ്നപരിഹാരത്തിന് ഇടപെടാം എന്ന് ഗവര്ണര് അറിയിച്ചതായി കൂടിക്കാഴ്ചയ്ക്ക് ശേഷം സമര സമിതി പ്രവര്ത്തകര് അറിയിച്ചു.ക്യാമ്പുകളില് കഴിയുന്ന കുടുംബങ്ങളെ പറ്റി ഗവര്ണര് ചോദിച്ചറിഞ്ഞതായും സമര സമിതി പ്രവര്ത്തകര് വ്യക്തമാക്കി. തങ്ങള് മുന്നോട്ടുവെച്ച 7 ആവശ്യവും ഗവര്ണര് അനുഭാവപൂര്വ്വം പരിഗണിച്ചതായും സമര സമിതി അറിയിച്ചു. ദല്ഹിയില് നിന്ന് തിരിച്ചെത്തിയ ശേഷം ക്യാമ്പുകള് സന്ദര്ശിക്കും എന്നും അറിയിച്ചു.
വിഴിഞ്ഞം തുറമുഖ കവടത്തിന് മുന്നിലെ സമരപ്പന്തല് പൊളിച്ചു നീക്കണം എന്ന് നിര്ദ്ദേശം നല്കി ജില്ലാ ഭരണകൂടം. സമരപ്പന്തല് പൊളിച്ചു നീക്കാന് ഇന്ന് സമയപരിധി നിശ്ചയിച്ചാണ് സബ് ഡിവിഷണല് മജിസ്ട്രേട്ട് ഉത്തരവ് ഇറക്കിയത്. ക്രമസമാധാന പ്രശ്നവും നിര്മാണ പ്രവര്ത്തങ്ങള് തടസ്സപ്പെടുന്നതും ചൂണ്ടിക്കാട്ടിയാണ് ഉത്തരവ്. സമര പന്തല് പൊളിച്ചുനീക്കിയില്ലെങ്കില്, 30ന് സമരപ്രതിനിധികള് ഹാജരാകണം എന്നും ഉത്തരവില് പറയുന്നുണ്ട്. എന്നാല് സമരപ്പന്തല് പൊളിക്കില്ലെന്നും, സര്ക്കാര് തന്നെ പൊളിക്കട്ടെ എന്നുമാണ് സമരസമിതിയുടെ നിലപാട്.
അതിനിടെ സര്വ്വകലാശാല ലോകായുക്താ ബില്ലുമായി ബന്ധപ്പെട്ട് കര്ശ്ശന നിലപാട് തുടരുന്നതിനിടെ ഗവര്ണര് ആരിഫ് മുഹമ്മദ് ഖാനുമായി തദ്ദേശസ്വയംഭരണമന്ത്രി എം.ബി. രാജേഷും ചീഫ് സെക്രട്ടറി വി.പി. ജോയിയും കൂടിക്കാഴ്ച നടത്തി. സര്ക്കാര് സംഘടിപ്പിക്കുന്ന ലഹരി വിരുദ്ധ പ്രചാരണ പരിപാടിക്ക് ക്ഷണിക്കാനാണ് മന്ത്രിയും ചീഫ് സെക്രട്ടറിയും ഗവര്ണറെ കണ്ടത്. എന്നാല് വിഷയത്തില് ഇരുവരും മാധ്യമങ്ങളോട് പ്രതികരിക്കാന് തയ്യാറായില്ല.
