തിരുവനന്തപുരം : ഈ മാസം 28ന് കാര്യവട്ടം ഗ്രീന്‍ഫീല്‍ഡ് സ്‌റ്റേഡിയത്തില്‍ നടക്കുന്ന ഇന്ത്യ ദക്ഷിണാഫ്രിക്ക ടി20 മത്സരത്തിന്റെ ഭാഗമായുള്ള സുരക്ഷാ ക്രമീകരണങ്ങള്‍ ഉന്നത പോലീസ് ഉദ്യോഗസ്ഥര്‍ വിലയിരുത്തി. തിരുവനന്തപുരം സിറ്റി പോലീസ് കമ്മീഷണര്‍ സ്പര്‍ജന്‍കുമാര്‍, ഡെപ്യൂട്ടി കമ്മീഷണര്‍ അജിത് കുമാര്‍, സ്‌പെഷ്യല്‍ ബ്രാഞ്ച് എസിപി സതീഷ് കുമാര്‍, കണ്‍ട്രോള്‍ റൂം എസിപി പ്രതാപന്‍, സിറ്റി സൈബര്‍ വിങ് എസിപി ഹരി.സി.എസ് കഴക്കൂട്ടം എസ്എച്ഒ പ്രവീണ്‍.ജെ.എസ് എന്നിവരടങ്ങുന്ന സംഘമാണ് സുരക്ഷാ ക്രമീകരണങ്ങളുടെ പ്രാഥമിക വിലയിരുത്തല്‍ നടത്തിയത്. കേരള ക്രിക്കറ്റ് അസോസിയേഷന്‍ പ്രസിഡന്റ് സജന്‍.കെ.വര്‍ഗീസ്, സെക്രട്ടറി അഡ്വ: ശ്രീജിത്ത് വി നായര്‍ , ബിസിസിഐ ജോയിന്റ് സെക്രട്ടറി ജയേഷ് ജോര്‍ജ് , ടി20 മത്സരത്തിന്റെ ജനറല്‍ കണ്‍വീനര്‍ വിനോദ്.എസ്.കുമാര്‍, വെന്യൂ ഡയരക്ടര്‍ കാര്‍ത്തിക് വര്‍മ്മ എന്നിവരും പോലീസ് സംഘത്തിനൊപ്പമുണ്ടായിരുന്നു.
സുരക്ഷാ ക്രമീകരണങ്ങള്‍ സംബന്ധിച്ച പ്രാഥമിക പരിശോധനയാണ് നടന്നതെന്നും സജ്ജീകരണങ്ങള്‍ പൂര്‍ത്തിയാകുന്നമുറയ്‌ക്ക് കൂടുതല്‍ പരിശോധന നടത്തി കുറ്റമറ്റ സുരക്ഷ ഉറപ്പാക്കുമെന്നും കെസിഎ അധികൃതര്‍ പറഞ്ഞു. സ്‌റ്റേഡിയത്തിലെ ഗ്രൗണ്ടിന്റെ പരിപാലനച്ചുമതല കെസിഎക്കാണ്. മത്സരത്തിനുള്ള ഫീല്‍ഡ് ഓഫ് പ്ലേയും ഫ്‌ളഡ്‌ലൈറ്റ് സംവിധാനവും സജ്ജമായിക്കഴിഞ്ഞതായി കെസിഎ ഭാരവാഹികള്‍ വ്യക്തമാക്കി. കോവിഡിനു ശേഷം സ്‌റ്റേഡിയത്തില്‍ നടക്കുന്ന ആദ്യ അന്തരാഷ്‌ട്ര മത്സരമാണിത്. ഒരുക്കങ്ങള്‍ അവസാനഘട്ടത്തിലാണെന്നും. മത്സരത്തിനു മുന്‍പ് എല്ലാ സജ്ജീകരണങ്ങളും പൂര്‍ത്തിയാകുമെന്നും കെസിഎ ഭാരവാഹികള്‍ പറഞ്ഞു.
പ്രതികരിക്കാൻ ഇവിടെ എഴുതുക: