ബെംഗളൂരു: ക്രിമിനല്‍ പ്രവര്‍ത്തനങ്ങള്‍ തടയുന്നതിനുള്ള പ്രതിരോധ നടപടിയായി അയല്‍ സംസ്ഥാനമായ കേരളത്തില്‍ നിന്നും അതിര്‍ത്തി ജില്ലയായ കുടകില്‍ എത്തുന്ന ആളുകളുടെ നീക്കത്തില്‍ കര്‍ണാടക സര്‍ക്കാര്‍ ജാഗ്രത ശക്തമാക്കി. സുള്ള്യയിലെ യുവമോര്‍ച്ച നേതാവ് പ്രവീണ്‍ കുമാര്‍ നെട്ടാരുവിന്റെ കൊലയാളികള്‍ കര്‍ണാടകത്തില്‍ നിന്നും രക്ഷപ്പെട്ട് കേരളത്തില്‍ അഭയം പ്രാപിച്ചെന്ന റിപ്പോര്‍ട്ടിനെ തുടര്‍ന്നാണ് നടപടി.
കേരള അതിര്‍ത്തിയായ കൊഡൗവിനോട് ചേര്‍ന്നുള്ള ദക്ഷിണ കന്നഡ ജില്ലയിലാണ് കൊലപാതകം നടന്നത്. ഇതിന്റെ ഭാഗമായി പുറത്ത് നിന്ന് കുടകിലേക്ക് വരുന്നവരെ പരിശോധിക്കാന്‍ പോലീസിന് നിര്‍ദ്ദേശം നല്‍കിയിട്ടുണ്ടെന്ന് ആഭ്യന്തര മന്ത്രി അരഗ ജ്ഞാനേന്ദ്ര പറഞ്ഞു.
കേരളത്തില്‍ നിന്നുള്ള നിരവധി ക്രിമിനലുകള്‍ കുടകില്‍ അഭയം പ്രാപിച്ചിട്ടുണ്ട്. ഇക്കൂട്ടര്‍ കര്‍ണാടകയില്‍ എത്തി കുറ്റകൃത്യങ്ങള്‍ ചെയ്യുകയും പിന്നീട് കേരളത്തിലേക്ക് ഒളിവില്‍പ്പോകുകയും ചെയ്യുന്നത് സാധാരണമായിരിക്കുന്നു. ഇത്തരത്തിലുള്ളവരെ പിടികൂടുകയെന്നതാണ് ഇനി സര്‍ക്കാരിന്റെ ലക്ഷ്യം. ഇതിന്റെ ഭാഗമായി കേരളത്തില്‍ നിന്നും കര്‍ണാടകയില്‍ എത്തുന്നവരെയെല്ലാം നിരീക്ഷിക്കുമെന്നും അരഗ ജ്ഞാനേന്ദ്ര പറഞ്ഞു.
ജാഗ്രത ശക്തമാക്കാന്‍ കുടക് ജില്ലയിലുടനീളം തൊണ്ണൂറ്റിയഞ്ച് സിസിടിവി ക്യാമറകള്‍ സ്ഥാപിച്ചു. ക്രിമിനല്‍ പ്രവര്‍ത്തനങ്ങള്‍ തടയുന്നതിനുള്ള എല്ലാ പ്രതിരോധ നടപടികളും സ്വീകരിക്കാന്‍ കര്‍ണാടക സര്‍ക്കാര്‍ തയ്യാറാണെന്നും അദ്ദേഹം പറഞ്ഞു.
പ്രതികരിക്കാൻ ഇവിടെ എഴുതുക: