കോഴിക്കോട്: കോഴിക്കോട് മെഡിക്കല് കോളേജിലെ സുരക്ഷ ജീവനക്കാരെ മര്ദിച്ച കേസില് നാല് ഡിവൈഎഫ്ഐ പ്രതികളുടെ മുന്കൂര് ജാമ്യാപേക്ഷ കോടതി തള്ളി. കോഴിക്കോട് ജില്ലാ സെഷന്സ് കോടതിയുടെ ചുമതലയുള്ള പോക്സോ കോടതിയാണ് ജാമ്യം നിഷേധിച്ചത്.
ഇക്കഴിഞ്ഞ ബുധനാഴ്ച കോഴിക്കോട് മെഡിക്കല് കോളേജ് ആശുപത്രിയില് ഡിവൈഎഫ്ഐ പ്രവര്ത്തകര് അക്രമം അഴിച്ചുവിട്ടത്. ഡിവൈഎഫ്ഐ ജില്ലാ ജോയിന്റ് സെക്രട്ടറി കെ അരുണിന്റെ നേതൃത്വത്തിലുള്ള എട്ട് അംഗ സംഘമാണ് ആക്രമണം നടത്തിയത്. മെഡിക്കല് കോളേജ് സൂപ്രണ്ടിനെ കാണാനെത്തിയ ദമ്പതികളെ സുരക്ഷാ ജീവനക്കാര് തടഞ്ഞതാണ് പ്രശ്നങ്ങളുടെ തുടക്കം. ദമ്പതികള് പോയതിന് പിന്നാലെ സ്ഥലത്തെത്തിയ അക്രമിസംഘം ജീവനക്കാരെ മര്ദിക്കുകയായിരുന്നു. മൂന്ന് സുരക്ഷാ ജീവനക്കാര്ക്കും, രോഗികളെ സന്ദര്ശിക്കാനെത്തിയവര്ക്കുമാണ് മര്ദനമേറ്റത്. കേസില് പ്രതിചേര്ക്കപ്പെട്ട അരുണ്, രാജേഷ്, അഷിന്, മുഹമ്മദ് ഷബീര് എന്നിവരുടെ മുന്കൂര് ജാമ്യാപേക്ഷയാണ് കോഴിക്കോട് ജില്ലാ കോടതി തള്ളിയത്.
അതിനിടെ, കേസിലെ മുഖ്യപ്രതിയും ഡിവൈഎഫ്ഐ നേതാവുമായ കെ അരുണിനെ കുറിച്ചുള്ള കൂടുതല് വിവരങ്ങള് പുറത്ത് വന്നു. ആരോഗ്യവകുപ്പിന് കീഴിലെ കരാര് ജീവനക്കാരനാണ് കെ അരുണ് എന്ന വിവരമാണ് പുറത്ത് വരുന്നത്. മെഡിക്കല് സര്വീസ് കോര്പറേഷന് കീഴിലെ വെയര്ഹൗസിലെ പായ്ക്കിംഗ് വിഭാഗത്തിലായിരുന്നു അരുണിന്റെ ജോലി. എന്നാല് മാസങ്ങളായി അരുണ് ജോലിക്ക് വരാറില്ലെന്നാണ് മാനേജരുടെ വിശദീകരണം.
