തിരുവനന്തപുരം : തിരുവനന്തപുരത്ത് രണ്ടു ദിവസത്തെ പഴക്കമുള്ള നിലയില്‍ വയോധികയെ വീട്ടിനുള്ളില്‍ നിന്നും കണ്ടെത്തി. പൗഡിക്കോണം കല്ലറത്തല ഭഗവതിവിലാസത്തില്‍ വാടകയ്‌ക്കു താമസിക്കുന്ന റിട്ടയേര്‍ഡ് നഴ്സിങ് സൂപ്രണ്ട് വിജയമ്മയെ(80) ആണ് കണ്ടെത്തിയത്. ശനിയാഴ്ച രാത്രിയോടെയാണ് സംഭവം പുറത്തറിയുന്നത്.
വിജയമ്മയും ഇരുകാലുകളുമില്ലാത്ത ഏകമകനും മാത്രമാണ് വീട്ടിലുണ്ടായിരുന്നത്. 47 കാരനായ മകനാണ് അമ്മ വീട്ടിനകത്ത് മരിച്ചുകിടക്കുന്നതായി ബന്ധുക്കളെ വിളിച്ച് അറിയിച്ചത്. വീട്ടിലെത്തിയ പോലീസ് കിടപ്പുമുറിയില്‍ കട്ടിലിനടിയില്‍ നിന്നാണ് മൃതദേഹം കണ്ടെടുത്തത്. മുഖത്തും ശരീരത്തിന്റെ മറ്റുഭാഗങ്ങളിലും പരിക്കേറ്റ പാടുകളുണ്ട്. മൃതദേഹത്തിന് രണ്ടുദിവസത്തെയെങ്കിലും പഴക്കമുണ്ടെന്നാണ് നിഗമനം. സംഭവത്തില്‍ ശ്രീകാര്യം പോലീസ് കേസെടുത്തു. ഫോറന്‍സിക് വിദഗ്ധരടക്കം സ്ഥലത്തെത്തി പരിശോധന നടത്തി.
പരസ്പര വിരുദ്ധമായാണ് മകന്‍ സംസാരിക്കുന്നതെന്ന് പോലീസ് പറഞ്ഞു. അസ്വാഭാവിക മരണത്തിനാണ് കേസെടുത്തിരിക്കുന്നത്. വിജയമ്മയുടെ മരണം കൊലപാതകമെന്നാണ് പോലീസ് സംശയിക്കുന്നത്. ഫോറന്‍സിക് വിഭാഗവും വിരലടയാള വിദഗ്ധരും സ്ഥലത്തെത്തി പരിശോധന നടത്തി. പോസ്റ്റുമോര്‍ട്ടത്തിന് ശേഷമേ മരണകാരണം കണ്ടെത്താന്‍ കഴിയു എന്ന് പൊലീസ് അറിയിച്ചു.
പ്രതികരിക്കാൻ ഇവിടെ എഴുതുക: