തിരുവനന്തപുരം : ഗുണനിലവാരമില്ലാത്ത റോഡുകള്‍ നിര്‍മിക്കുന്ന കരാറുകാര്‍ക്കെതിരെ കേസെടുക്കാനൊരുങ്ങി പൊതുമരാമത്ത് വകുപ്പ്. ഇനി നിര്‍മാണം പൂര്‍ത്തിയായി ആറ് മാസത്തിനകം ഏതെങ്കിലും റോഡ് പൊട്ടിപ്പൊളിഞ്ഞതായി പരാതി ഉയര്‍ന്നാല്‍ കരാറുകാരും, എഞ്ചിനീയര്‍മാരും കുടുങ്ങും. ഇവരെ പ്രതികളാക്കി വിജിലന്‍സ് കേസെടുക്കുമെന്ന് പൊതുമരാമത്ത് വകുപ്പ് അറിയിച്ചിട്ടുണ്ട്.
റോഡുകള്‍ നിര്‍മാണത്തിന് പിന്നാലെ തകരുന്നതില്‍ ഹൈക്കോടതി രൂക്ഷ വിമര്‍ശനങ്ങള്‍ ഉയര്‍ത്തുകയും ഇതിനെതിരെ ഉത്തരവിറക്കുകയും ചെയ്തിരുന്നു. ഇതിന്റെ പശ്ചാത്തലത്തിലാണ് റോഡുകളുടെ ഗുണ നിലവാരത്തില്‍ വീഴ്ച വരുത്തുന്ന കരാറുകാര്‍ക്കും എഞ്ചിനീയര്‍മാര്‍ക്കുമെതിരെ നടപടിക്കൊരുങ്ങുന്നത്.
ഉദ്യോഗസ്ഥരെയും കരാറുകാരേയും പ്രതികളാക്കി കേസെടുക്കുന്ന പക്ഷം അന്വേഷണം ആറ് മാസത്തിനകം പൂര്‍ത്തിയാക്കുകയും കോടതിയില്‍ റിപ്പോര്‍ട്ട് സമര്‍പ്പിക്കുകയും വേണം. നിര്‍മാണം പൂര്‍ത്തിയാക്കുകയോ അറ്റകുറ്റപ്പണി നടത്തുകയോ ചെയ്ത റോഡ് ഒരു വര്‍ഷത്തിനിടയില്‍ തകര്‍ന്നാലും ഉദ്യോഗസ്ഥരും കരാറുകാരും അന്വേഷണം നേരിടേണ്ടി വരും. ഇത്തരം അന്വേഷണം മൂന്ന് മാസത്തിനകം പൂര്‍ത്തിയാക്കണം. മനഃപൂര്‍വമായതോ, ഉത്തരവാദിത്തമില്ലായ്മ മൂലമുള്ളതോ ആയ വീഴ്ച കണ്ടെത്തിയാല്‍ ഉദ്യോഗസ്ഥര്‍ക്കും കരാറുകാര്‍ക്കും എതിരെ ക്രിമിനല്‍ നടപടി സ്വീകരിക്കുമെന്നും ഉത്തരവില്‍ പറയുന്നു. എന്നാല്‍ കാലാവസ്ഥ, മഴ തുടങ്ങിയ പ്രശ്‌നങ്ങളാല്‍ റോഡ് തകര്‍ന്നാല്‍ നടപടികളൊന്നുമുണ്ടാകില്ല.
പ്രതികരിക്കാൻ ഇവിടെ എഴുതുക: