നെടുങ്കണ്ടം: വാഹനം കടത്തിക്കൊണ്ടു പോയ കേസില്‍ വിവരശേഖരണം നടത്തുന്നതിനിടെ 500 രൂപ നോട്ടുകള്‍ കീറി എറിഞ്ഞ യുവാവ് അറസ്റ്റില്‍. നെടുങ്കണ്ടം െേപാലീസ് സ്റ്റേഷനിലെ പബ്ലിക് റിലേഷന്‍ കൗണ്ടറിന് മുന്നിലാണ് സംഭവം. പാറത്തോട് സബിന്‍ ഹൗസില്‍ പ്രകാശ്(27) ആണ് 500 രൂപയുടെ മൂന്ന് നോട്ടുകള്‍ കീറി എറിഞ്ഞത്. കഴിഞ്ഞ ദിവസമാണ് കേസിനാസ്പദമായ സംഭവം.
പ്രകാശും സുഹൃത്തായ ശരത് കുമാറും ചേര്‍ന്ന് സമീപകാലത്ത് ഒരു വാഹനം വാങ്ങി. ഈ വാഹനമെടുത്ത ശേഷം ശരത് കുമാറും സാഹായിയും ചേര്‍ന്ന് പ്രകാശിനെ അറിയിക്കാതെ വാഹനം കടത്തിക്കൊണ്ടുപോയി. തുടര്‍ന്ന് ഇരുവിഭാഗവും തമ്മിലുള്ള തര്‍ക്കമാണ് പരാതിയായി പോലീസ് സ്റ്റേഷനിലെത്തിയത്. പ്രശ്നം സംസാരിച്ച് തീര്‍ക്കുന്നതിനിടെ വാഹനത്തിനുള്ളിലെ ടൂള്‍സ് കാണാതായെന്ന് പ്രകാശ് പറയുകയും നഷ്ടപരിഹാരം വേണമെന്ന് പറയുകയും ചെയ്തു. ഇത് പോലീസ് സ്റ്റേഷനില്‍ പ്രകാശും ശരത് കുമാറും തമ്മില്‍ വീണ്ടും തര്‍ക്കത്തിനിടയാക്കി. ഇതോടെ പ്രകോപിതനായ പ്രകാശ് കയ്യില്‍ കരുതിയിരുന്ന മൂന്ന് 500 രൂപ നോട്ടുകള്‍ കീറിയെറിഞ്ഞു. ഇതോടെ പോലീസ് പൊതുമുതല്‍ നശിപ്പിച്ചതിന് കേസെടുത്ത് പ്രകാശിനെ കോടതിയില്‍ ഹാജരാക്കി. എസ്ഐമാരായ പി.ജെ. ചാക്കോ, പി.കെ. സജിവന്‍ എന്നിവരടങ്ങിയ സംഘമാണ് കേസ് അന്വേഷിക്കുന്നത്. പ്രതിയെ നെടുങ്കണ്ടം ഒന്നാം ക്ലാസ് മജിസ്ട്രേട്ട് കോടതി റിമാന്‍ഡ് ചെയ്തു. നെടുങ്കണ്ടം പോലീസ് പിഡിപിപി ആക്ട് 3(2)(ഇ) പ്രകാരം പൊതുമുതല്‍ നശിപ്പിച്ചെന്ന വകുപ്പിട്ടാണ് കേസെടുത്തിരിക്കുന്നത്.
പ്രതികരിക്കാൻ ഇവിടെ എഴുതുക: