കൊല്ലം: കടപ്പാക്കട സ്‌പോര്‍ട്‌സ് ക്ലബ്ബിന്റെ ആഭിമുഖ്യത്തില്‍ ഓര്‍മ ക്ലിനിക്ക് ആരംഭിക്കുന്നു. ഓര്‍മ നഷ്ടപ്പെടുന്നവര്‍ക്ക് അത് പിടിച്ചുനിര്‍ത്താനും രോഗാവസ്ഥ തീവ്രമാകുന്നതിന്റെ കാലപരിധി നീട്ടാനുമുള്ള ജീവകാരുണ്യ സംരംഭമാണ് ഇത്. സ്മൃതിനാശം സംഭവിച്ചവരുടെ പരിചരണത്തിന് മാര്‍ഗ്ഗനിര്‍ദ്ദേശവും സഹായവും നല്‍കും.
27ന് വൈകിട്ട് ആറിന് ധനമന്ത്രി കെ.എന്‍.ബാലഗോപാല്‍ ഉദ്ഘാടനം ചെയ്യും. നടന്‍ മോഹന്‍ലാല്‍ വീഡിയോ സന്ദേശം നല്‍കും. ക്ലബ്ബില്‍ ഡോ. ശ്രീകുമാറിന്റെ നേതൃത്വത്തില്‍ എല്ലാ ബുധനാഴ്ചയും ഓര്‍മ ക്ലിനിക്ക് രാവിലെ ഒമ്പതുമണി മുതല്‍ ഉച്ചയ്‌ക്ക് ഒരു മണിവരെ പ്രവര്‍ത്തിക്കുമെന്ന് ഭാരവാഹികള്‍ അറിയിച്ചു.
ന്യൂറോളജിസ്റ്റ്, സൈക്യാട്രിസ്റ്റ്, ഫിസിഷ്യന്‍, ജൂനിയര്‍ ഡോക്ടര്‍, ആയുര്‍വേദ ഡോക്ടര്‍,നഴ്‌സുമാര്‍, ഫിസിയോ തെറാപ്പിസ്റ്റ് എന്നിവര്‍ ഉള്‍പ്പെടുന്ന മെഡിക്കല്‍ സംഘത്തിന്റെ സൗജന്യ സേവനമാണ് ക്ലിനിക്കില്‍ നല്‍കുക. മ്യൂസിക് തെറാപ്പി, യോഗ ഡാന്‍സ്, തുടങ്ങിയ സംരംഭങ്ങളും ഉണ്ടാകും. ലോക അല്‍ഷിമേഴ്‌സ് മാസമായ സെപ്തംബറില്‍ കൊല്ലത്ത് മെമ്മറി വാക്ക് സംഘടിപ്പിക്കുമെന്നും അറിയിച്ചു.
പ്രതികരിക്കാൻ ഇവിടെ എഴുതുക: