തിരുവനന്തപുരം:പാകിസ്ഥാനോട് കൂറ് പുലര്‍ത്തുന്ന രാജ്യദ്രോഹിയായ ജലീലിനെ മഹാനാക്കി ഉയര്‍ത്തിയത് പിണറായി വിജയന്‍ ചെയ്ത ഏറ്റവും വലിയ രാഷ്‌ട്രീയ പാപമെന്ന് ചെറിയാന്‍ ഫിലിപ്പ്.
മതതീവ്രവാദികളുടെ വോട്ട് നേടാനുള്ള വര്‍ഗ്ഗീയ പ്രീണനത്തിന് ജലീലിനെ ആയുധമാക്കിയതു കൊണ്ടാണ് പിണറായി ഇപ്പോഴും അദ്ദേഹത്തെ സംരക്ഷിക്കുന്നത്. പാകിസ്താന്‍ കൈവശപ്പെടുത്തിയ കശ്മീരിനെ ആസാദ് കശ്മീര്‍ എന്നും ഇന്ത്യയുടെ ഭാഗമായ കശ്മീരിനെ ഇന്ത്യന്‍ അധീന കശ്മീര്‍ എന്നും വിളിക്കുന്ന ജലീലിനോട് രാജ്യസ്നേഹികളായ ഒരു ഭാരതീയനും പൊറുക്കില്ല. – ചെറിയാന്‍ ഫിലിപ്പ് തന്റെ ഫേസ് ബുക്ക് കുറിപ്പില്‍ പറയുന്നു.
മുഹമ്മദാലി ജിന്നയുടെ പാകിസ്ഥാന്‍ വാദത്തിന് സമാന്തരമായി മലബാറില്‍ മാപ്പിളസ്ഥാന്‍ വാദമുയര്‍ത്തിയവരുടെ ആത്മീയ പിന്‍ഗാമിയാണ് ജലീല്‍. ആദ്യം മുസ്ലിം ലീഗിലും പിന്നീട് സിപിഎമ്മിലും നുഴഞ്ഞുകയറിയ രാജ്യദ്രോഹിയാണ് അദ്ദേഹം.- ചെറിയാന്‍ കുറ്റപ്പെടുത്തി.
മന്ത്രിയെന്ന നിലയില്‍ ജലീല്‍ പ്രൊട്ടോക്കോള്‍ ലംഘിച്ച് വിദേശ രാജ്യങ്ങളുമായി മമതാബന്ധം സ്ഥാപിച്ചത് മുഖ്യമന്ത്രിയുടെ അനുവാദത്തോടെയാണ്. ഷാര്‍ജ ഭരണാധികാരിയുമായുള്ള കൂടിക്കാഴ്ചകളില്‍ പങ്കെടുത്ത ഏക മന്ത്രിസഭാംഗമാണ്. അതുകൊണ്ടാണ് മുഖ്യമന്ത്രി ഇപ്പോഴും ജലീലിനെ തള്ളിപ്പറയാതെ തോളിലേറ്റി കൊണ്ടു നടക്കുന്നതെന്നും ചെറിയാന്‍ ഫിലിപ്പ് ആരോപിക്കുന്നു.
പ്രതികരിക്കാൻ ഇവിടെ എഴുതുക: