പത്തനംതിട്ട: ചിങ്ങമാസ പൂജകള്ക്കായി ശബരിമല ശ്രീധര്മ്മശാസ്താ ക്ഷേത്രനട ആഗസ്ത് 16ന് വൈകിട്ട് അഞ്ചിന് തുറക്കും. തന്ത്രി കണ്ഠര് രാജീവരുടെ മുഖ്യകാര്മ്മികത്വത്തില് മേല്ശാന്തി എന്. പരമേശ്വരന് നമ്പൂതിരി നട തുറന്ന് ദീപങ്ങള് തെളിക്കും. തുടര്ന്ന് ഗണപതി, നാഗര് തുടങ്ങിയ ഉപദേവതാ ക്ഷേത്ര നടകളും തുറന്ന് വിളക്ക് തെളിക്കും. പതിനെട്ടാംപടിക്ക് മുന്നിലായുള്ള ആഴിയില് മേല്ശാന്തി അഗ്നിപകരും.
തുടര്ന്ന് അയ്യപ്പഭക്തര്ക്ക് പതിനെട്ടാം പടികയറിയുള്ള ദര്ശനത്തിന് അവസരമാകും. മാളികപ്പുറം മേല്ശാന്തി ശംഭുനമ്പൂതിരി മാളികപ്പുറം ക്ഷേത്രനട തുറക്കും. വെര്ച്വല് ക്യൂ സംവിധാനത്തിലൂടെ ബുക്ക് ചെയ്ത് അയ്യപ്പഭക്തര്ക്ക് ദര്ശനത്തിനെത്താം. കൂടാതെ നിലയ്ക്കലില് അയ്യപ്പഭക്തന്മാര്ക്ക് സ്പോട്ട് ബുക്കിങ് സംവിധാനവുമൊരുക്കിയിട്ടുണ്ട്.
ചിങ്ങം ഒന്നായ 17ന് പുലര്ച്ചെ അഞ്ചിന് നട തുറന്ന് പതിവ് അഭിഷേകവും നെയ്യഭിഷേകവും മഹാഗണപതിഹോമവും മറ്റ് പൂജകളുമുണ്ടാകും. ഉദയാസ്തമന പൂജ, അഷ്ടാഭിഷേകം, കലശാഭിഷേകം, കളഭാഭിഷേകം, പടിപൂജ, പുഷ്പാഭിഷേകം എന്നിവ നട തുറന്നിരിക്കുന്ന ദിവസങ്ങളിലുണ്ടാകും. പൂജകള് പൂര്ത്തിയാക്കി 21ന് രാത്രി 10ന് ഹരിവരാസനം പാടി നട അടയ്ക്കും. ഓണനാളുകളിലെ പൂജകള്ക്കായി സപ്തംബര് ആറിന് വൈകിട്ട് നട തുറന്ന് 10ന് രാത്രി നട അടയ്ക്കും.
