അങ്കമാലി: കൂട്ടുകാര്‍ക്കൊപ്പം കോളജിലേക്ക് പോകുവാന്‍ റെയില്‍വെ സ്റ്റേഷന് സമീപം ട്രാക്ക് മറിച്ചു കടക്കുന്നതിനിടെ ബി.എസ്.സി വിദ്യാര്‍ഥിനി റെയിൽവേ റിപ്പയർ വാൻ തട്ടി മരിച്ചു. അങ്കമാലി പീച്ചാനിക്കാട് തേലപ്പിള്ളി അനു സാജനാണ് (21) മരിച്ചത്. ഒപ്പമുണ്ടായിരുന്ന കൂട്ടുകാര്‍ അത്ഭുതകരമായി രക്ഷപ്പെട്ടു.
അങ്കമാലി പുളിയനം തേലപ്പിള്ളി വീട്ടില്‍ സാജന്റെ മകളാണ് അനു. ആലുവ ഭാഗത്ത് നിന്ന് ട്രെയിന്‍ വരുന്നത് കണ്ട് അടുത്ത ട്രാക്കിലേക്ക് നീങ്ങിനില്‍ക്കുകയായിരുന്നു അനു. ഇതിനിടെയില്‍ ചാലക്കുടി ഭാഗത്ത് നിന്ന് ആലുവയിലേക്ക് പോവുകയായിരുന്നു റെയില്‍വേ റിപ്പയര്‍ വാന്‍ ഇടിക്കുകയായിരുന്നു. ഇടിയുടെ ആഘാതത്തില്‍ തെറിച്ചുപോയ അനുവിന് ഇരുമ്ബുകമ്ബിയില്‍ ഇടിച്ചുവീണ് ഗുരുതര പരിക്കേറ്റു.
അഗ്നി രക്ഷ സേനയെത്തി മൃതദേഹം അങ്കമാലി താലൂക്ക് ആശുപത്രിയിലേക്ക് മാറ്റി. അങ്കമാലി മോര്‍ണിങ് സ്റ്റാര്‍ കോളജിലെ ബി.എസ്.സി സുവോളജി അവസാന വര്‍ഷ വിദ്യാര്‍ത്ഥിനിയാണ്. അമ്മ: സിന്ധു. സഹോദരന്‍: എല്‍ദോ സാജന്‍. സംസ്കാരം ശനിയാഴ്ച ഉച്ചയോടെ പീച്ചാനിക്കാട് താബോര്‍ സെന്റ് ജോര്‍ജ് യാക്കോബായ സുറിയാനി പള്ളി സെമിത്തേരിയില്‍.
മുനിസിപ്പല്‍ ബസ് സ്റ്റാന്‍ഡില്‍ ഇറങ്ങുന്ന വിദ്യാര്‍ത്ഥികള്‍ റെയില്‍വേ ട്രാക്ക് മുറിച്ചുകടന്നാണ് സമീപത്തെ കോളേജുകളിലേക്ക് പോകുന്നത്. കുറച്ച്‌ നാള്‍ മുന്‍പ് പ്രദേശത്ത് ഒരു വിദ്യാര്‍ത്ഥിനി ട്രെയിനിടിച്ച്‌ മരിച്ചിരുന്നു.
പ്രതികരിക്കാൻ ഇവിടെ എഴുതുക: