കൊല്‍ക്കത്ത: സമൂഹമാദ്ധ്യമങ്ങളില്‍ വൈറലായി ബംഗാള്‍ മുഖ്യമന്ത്രി മമത ബാനര്‍ജിയുടെ പാചക വീഡിയോ. മമത ബാനര്‍ജി മോമോസ് ഉണ്ടാക്കുന്നതിന്റെ ദൃശ്യങ്ങളാണ് പ്രചരിക്കുന്നത്. ഡാര്‍ജിലിംഗ് സന്ദര്‍ശനത്തിനിടെ തെരുവിലെ ഭക്ഷണശാലകളില്‍ പോകുന്നതും അവിടുത്തെ ഭക്ഷണങ്ങള്‍ പരീക്ഷിക്കുന്നതിന്റെയും ചിത്രങ്ങളും മമത ഫേസ്ബുക്കിലൂടെ പങ്കുവച്ചു.
സ്ത്രീകള്‍ നടത്തുന്ന ഒരു സ്റ്റാള്‍ സന്ദര്‍ശിക്കവെയാണ് മമത മോമോസ് ഉണ്ടാക്കിയത്. ‘ഈ നിമിഷങ്ങള്‍ നിങ്ങളുമായി പങ്കുവയ്‌ക്കുന്നതില്‍ സന്തോഷമുണ്ട്. ഓരോ സന്ദര്‍ശനത്തിലും മധുരമായ ഓര്‍മകള്‍ സമ്മാനിക്കുന്ന ഇവിടുത്തെ കഠിനാധ്വാനികളായ ഓരോ വ്യക്തികള്‍ക്കും എന്റെ നന്ദി.’ -മമത ചിത്രത്തിനൊപ്പം കുറിച്ചു.
കഴിഞ്ഞ തവണയും മമത ഡാര്‍ജിലിംഗ് സന്ദര്‍ശിച്ചപ്പോള്‍ പാചകം ചെയ്തിരുന്നു. മൂന്ന് ദിവസത്തെ സന്ദര്‍ശനത്തിനായി ഡാര്‍ജിലിംഗിലെത്തിയ ബംഗാള്‍ മുഖ്യമന്ത്രി പാനി പൂരി ഉണ്ടാക്കുന്നതിന്റെ ദൃശ്യങ്ങള്‍ കഴിഞ്ഞ ദിവസം പുറത്തുവിട്ടിരുന്നു. ഇതും സമൂഹമാദ്ധ്യമങ്ങളില്‍ വൈറലായിരുന്നു.
പ്രതികരിക്കാൻ ഇവിടെ എഴുതുക