കൊല്ലൂര് : മൂകാംബികയില് ദര്ശനം നടത്തി കോടിയേരി ബാലകൃഷ്ണന്റെ മകന് ബിനോയ് കോടിയേരി. മുംബൈ സ്വദേശിനി നല്കിയ പീഡന കേസ് ഇന്ന് പരിഗണിക്കാനിരിക്കേയാണ് ബിനോയ് കൊല്ലൂര് മൂകാംബികയില് സന്ദര്ശനം നടത്തിയിരിക്കുന്നത്. ക്ഷേത്ര ദര്ശനത്തിന് ശേഷം ദുര്ഗ്ഗാ ദേവിയെ പ്രീതിപ്പെടുത്തുന്നതിനായുള്ള ചണ്ഡികാ ഹോമം വഴിപാടായി കഴിച്ചു. ഇതിന്റെ ദൃശ്യങ്ങള് സമൂഹ മാധ്യമങ്ങള് വഴി പുറത്തുവന്നിട്ടുണ്ട്.
ബിനോയ് കോടിയേരിക്കെതിരെയുള്ള പീഡനക്കേസ് ഒത്തു തീര്പ്പാക്കണമെന്ന് ആവശ്യപ്പെട്ട് നല്കിയ അപേക്ഷയാണ് ഇന്ന് മുംബൈ ഹൈക്കോടതി പരിഗണിക്കുന്നത്. കുട്ടിയുടെ ഭാവി പരിഗണിച്ച് കേസ് ഒത്തുതീര്പ്പാക്കുകയാണെന്നാണ് ബിനോയ് കോടിയേരിയും, യുവതിയും നല്കിയ അപേക്ഷയില് പറയുന്നത്.
കഴിഞ്ഞ തവണ അപേക്ഷ പരിഗണിച്ചപ്പോള് ഒത്തുതീര്പ്പിനുള്ള വ്യവസ്ഥകള് അറിയിക്കാന് കോടതി ഇരുവരോടും ആവശ്യപ്പെട്ടിരുന്നു. ഇത് പ്രകാരം ഇരുവരും വ്യവസ്ഥകള് കോടതിയെ അറിയിച്ചിട്ടുണ്ട്. കുട്ടിയുടെ ഭാവികാര്യങ്ങളില് വ്യക്തത വന്നാല് മാത്രമേ ഒത്തുതീര്പ്പിന് കോടതി അനുമതി ലഭിക്കൂ. അതേസമയം ഡിഎന്എ ഫലം പുറത്തുവിടാനുള്ള നടപടി ക്രമങ്ങള്ക്കിടെയാണ് ഒത്തുതീര്പ്പിനായി ഇരുവരും കോടതിയെ സമീപിച്ചിരിക്കുന്നത്. ഡിഎന്എ പരിശോധനാ ഫലം ഇപ്പോഴും ഹൈക്കോടതിയുടെ പരിഗണനയിലാണ്.
