തിരുവനന്തപുരം: മദനിയുടെ കൂടെ പിണറായി വിജയന് വേദി പങ്കിടാമെങ്കില് പ്രതിപക്ഷ നേതാവ് വി.ഡി. സതീശന് ആര്എസ്എസ് വേദി പങ്കിട്ടതില് തെറ്റില്ലെന്ന് നടന് ഹരീഷ് പേരടി. സിപിഎം സംസ്ഥാന സെക്രട്ടറി കോടിയേരി ബാലകൃഷ്ണന് തെരഞ്ഞെടുപ്പ് കാലത്ത് സുകുമാരന് നായരെയും വെള്ളാപ്പളി നടേശനെയും കാന്തപുരം മുസ്ലിയാരെയും കാണാന് പോകുന്നതുകൊണ്ട് തെറ്റില്ലെങ്കില് പ്രതിപക്ഷ നേതാവിന് ആര്എസ്എസ് പരിപാടിയില് പങ്കെടുക്കാമെന്നും ഹരീഷ് പേരടി ഫേസ്ബുക്ക് പോസ്റ്റിലൂടെ അറിയിച്ചു.
നിങ്ങള്ക്ക് നിങ്ങളുടെ രാഷ്ട്രിയം ഉറക്കെ പറഞ്ഞുകൊണ്ടുതന്നെ അവരുടെ വേദികള് പങ്കിടുന്നതില് എന്താണ് തെറ്റ്. തനിക്ക് ഒരുപാട് ആര്എസ്എസ് സിപിഎം സുഹൃത്തുക്കളുണ്ട്. പിണറായി വിജയന് മോദിയെ കാണാന് പോകുന്നതുപോലെ പരസ്പ്പരം ബന്ധപ്പെടാതെ മുന്നോട്ട് പോവാന് പറ്റില്ല എന്ന് തോന്നുന്ന സന്ദര്ഭങ്ങളില് താന് അവരേയും അവര് തന്നെയും കാണാന് വരാറുണ്ട്.
ബിജെപിയെ ഇന്ത്യയിലെ ജനങ്ങള് തെരഞ്ഞെടുപ്പിലൂടെ അധികാരത്തിലേറ്റിയതാണ്. അല്ലാതെ അവര് സായുധ വിപ്ലവം നടത്തി അധികാരത്തില് എത്തിയതല്ല. അയിത്തവും തൊട്ടുകൂടായ്മയും ആര് ആരോട് ചെയ്താലും അത് വര്ഗ്ഗീയതയാണെന്നും ഹരീഷ് പേരടിയുടെ എഫ്ബി പോസ്റ്റില് പറയുന്നുണ്ട്.
