തിരുവനന്തപുരം: ഭരണഘടനയെ അവഹേളിച്ച സജി ചെറിയാന്റെ വിവാദ പ്രസംഗത്തിനെതിരായ പരാതിയില് പൊലീസ് കേസെടുത്തു. മന്ത്രി ഭരണഘടനയെ അവഹേളിച്ചെന്ന പരാതിയില് കേസെടുക്കണമെന്ന് തിരുവല്ല ജുഡീഷ്യല് ഫസ്റ്റ് ക്ലാസ് മജിസ്ട്രേറ്റ് കോടതി പൊലീസിന് നിര്ദേശം നല്കിയിരുന്നു. കോടതി നിര്ദേശിച്ചാല് 24 മണിക്കൂറിനുള്ളില് കേസടുക്കണം. ഇതിനാലാണ് പൊലീസ് ഇന്ന് തന്നെ നടപടിയിലേക്ക് കടന്നത്. പ്രിവന്ഷന് ഓഫ് ഇന്സള്ട്ട് ടു നാഷണല് ഓണര് ആക്ടിലെ രണ്ടാം വകുപ്പ് പ്രകാരമാണ് കേസെടുത്തത്. പ്രസംഗത്തിന്റെ വീഡിയോ ദൃശ്യം പരിശോധിച്ച ശേഷമായിരുന്നു കീഴ്വായ്പൂര് പൊലീസിന്റെ നടപടി. വാക്ക് കൊണ്ടോ പ്രവര്ത്തി കൊണ്ടോ ഭരണഘടനയെ അവഹേളിക്കുന്നതിനെതിരായ വകുപ്പാണിത്.
അതേസമയം, സജി ചെറിയാന് മന്ത്രിസ്ഥാനം രാജി വെച്ചെങ്കിലും വിവാദം ഇന്ന് ചേരുന്ന സിപിഎം സംസ്ഥാന സെക്രട്ടറിയേറ്റ് ചര്ച്ച ചെയ്യും. പകരം മന്ത്രി തത്കാലം വേണ്ടെന്നാണ് നിലവിലെ ചര്ച്ചകള്. മന്ത്രി രാജി വെച്ചതോടെ സജി ചെറിയാന്റെ വകുപ്പുകള് നിലവില് മുഖ്യമന്ത്രിക്കാണ് കൈമാറിയത്.
