തൃക്കാക്കര: കളക്ടറേറ്റില് നിറതോക്കുമായെത്തിയ മൂവാറ്റുപുഴ സ്വദേശി റിട്ട. തഹസില്ദാര് ഗോപാലകൃഷ്ണന് നായരെ (84) തൃക്കാക്കര പോലീസ് കസ്റ്റഡിയിലെടുത്തു. ഇന്നലെ വൈകിട്ട് മൂന്നോടെ എറണാകുളം കളക്ടറേറ്റിലായിരുന്നു സംഭവം. തോക്ക് ലൈസന്സ് പുതുക്കാനായാണ് ഗോപാലകൃഷ്ണന് ഇവിടെ എത്തിയത്.
ട്രഷറിയില് എത്തി തോക്ക് ലൈസന്സ് പുതുക്കുന്നതിനുള്ള ഫീസടച്ചശേഷം രസീതും പഴയ ലൈസന്സും മൂവാറ്റുപുഴ പോലീസ് സ്റ്റേഷനില് നിന്നുള്ള രേഖകള് ഉള്പ്പെടെ കളക്ടറേറ്റിലെ തപാല് വിഭാഗത്തില് കൊടുക്കാന് ശ്രമിക്കുന്നതിനിടെയാണ് സംഭവം. ബാഗില്നിന്ന് രേഖകള്ക്കൊപ്പം തോക്കും പുറത്തെടുത്ത് ചൂണ്ടിപ്പിടിച്ചതോടെ ജീവനക്കാര് ഭയന്നു. 0.22 റിവോള്വറില് എട്ട് ബുള്ളറ്റുകളും ലോഡ് ചെയ്തിരുന്നുവെന്ന് പരിശോധനയില് കണ്ടെത്തി.
ഉദ്യോഗസ്ഥരില് ചിലര് ഇത് ഫോട്ടോയെടുത്ത് എ.ഡിഎമ്മിന് അയച്ചുകൊടുത്തു. ഉടനെ പോലീസും സ്ഥലത്തെത്തി. ജീവനക്കാര്ക്ക് പരാതിയില്ലാത്തതിനാല് കേസെടുത്തിട്ടില്ല. സ്വയരക്ഷയ്ക്കായി റിവോള്വര് ഉപയോഗിക്കാന് 2007 മുതല് ഇദ്ദേഹത്തിന് കളക്ടര് ലൈസന്സ് നല്കിയിരുന്നതായും പോലീസ് വ്യക്തമാക്കി.
ഇയാളെ എഡിഎമ്മിന് മുന്നില് ഹാജരാക്കിയതിന് പിന്നാലെ തൃക്കാക്കര പോലീസെത്തി തോക്കും ഉണ്ടകളും കസ്റ്റഡിയിലെടുത്തു. വൈകുന്നേരത്തോടെ ഗോപാലകൃഷ്ണന് നായരെ ബന്ധുവിനെവരുത്തി കൂടെ വിട്ടയച്ചു.
