തിരുവനന്തപുരം: സംസ്ഥാനത്ത് കാലവര്ഷം ശക്തി പ്രാപിക്കുന്നു. കഴിഞ്ഞ ദിവസം കേരളത്തിലെ ഒട്ടുമിക്ക ജില്ലകളിലും കനത്ത മഴയാണ് രേഖപ്പെടുത്തിയത്. കര്ണാടക തീരം മുതല് വടക്കന് മഹാരാഷ്ട്ര തീരം വരെ നിലനില്ക്കുന്ന ന്യുനമര്ദ്ദ പാത്തിയുടെയും അറബികടലില് പടിഞ്ഞാറന് കാറ്റ് ശക്തമാകുന്നതിന്റെയും സ്വാധീന ഫലമായി കേരളത്തില് അടുത്ത അഞ്ചു ദിവസം ഇടിമിന്നലോട് കൂടിയ അതിശക്ത വ്യാപകമായ മഴക്ക് സാധ്യതയെന്ന് കേന്ദ്ര കാലാവസ്ഥ വകുപ്പ് അറിയിച്ചു.
പലയിടത്തും ഇന്നലെ രാവിലെ തുടങ്ങിയ മഴയ്ക്ക് വൈകിട്ടു മാത്രമാണ് ചെറിയ ഇടവേള ലഭിച്ചത്. ഇന്നും നാളെയും തിരുവനന്തപുരം, കൊല്ലം ഒഴികെയുള്ള ജില്ലകളില് യെല്ലോ അലര്ട്ടുണ്ട്. നാലു വരെ കേരള തീരത്ത് 50 കി.മീ. വരെ വേഗത്തില് കാറ്റിനു സാധ്യതയുള്ളതിനാല് മത്സ്യബന്ധനം നിരോധിച്ചു. ഇന്നലെയോടെ രാജ്യത്ത് എല്ലാ സംസ്ഥാനങ്ങളിലും കാലവര്ഷം സാന്നിധ്യമറിയിച്ചതായി ഐഎംഡി സ്ഥിരീകരിച്ചു.
