തിരുവനന്തപുരം : എകെജി സെന്ററിന് നേരെയുണ്ടായ ബോംബാക്രമണം സിപിഎം നേതാവ് ഇ.പി. ജയരാജന്റെ തിരക്കഥയെന്ന് കെപിസിസി പ്രസിഡന്റ് കെ. സുധാകരന്‍. എകെജി സെന്ററുമായി പരിചയമില്ലാത്തവര്‍ക്ക് ഇത്തരത്തില്‍ ആക്രമണങ്ങള്‍ നടത്താന്‍ സാധിക്കില്ലെന്നും കെപിസിസി പ്രസിഡന്റ് കെ. സുധാകരന്‍.
ആക്രമണങ്ങളില്‍ കോണ്‍ഗ്രസ്സുകാര്‍ക്ക് പങ്കില്ല. ആക്രമണം നടത്തിയത് കോണ്‍ഗ്രസ്സുകാരാണെന്നാണ് ഇ.പി. ജയരാജന്‍ പ്രഖ്യാപിച്ചത്. അദ്ദേഹത്തിന്റെ ക്യാമറയില്‍ ഈ ദൃശ്യങ്ങളുണ്ടോ. ഗുണ്ടാ ബന്ധമുള്ള ഇപിയാണ് ആക്രമണത്തിന് പിന്നില്‍. സിപിഎമ്മിന് ഇതില്‍ അറിവുണ്ടെന്ന് താന്‍ പറയില്ലെന്നും സുധാകരന്‍ പറഞ്ഞു.
രാഹുലിന്റെ വയനാട് സന്ദര്‍ശനത്തിന്റെ പ്രാധാന്യം കുറയ്‌ക്കാനുള്ള ശ്രമമാണ് നടന്നിരിക്കുന്നത്. കൂടാതെ മുഖ്യമന്ത്രിയുടെ കുടുംബത്തിനെതിരെ ഇപ്പോള്‍ ഉയര്‍ന്നിട്ടുള്ള ആരോപണങ്ങളില്‍നിന്ന് ശ്രദ്ധ തിരിക്കാനുള്ള നീക്കമാണ്. അക്രമത്തില്‍ കോണ്‍ഗ്രസുകാര്‍ക്ക് പങ്കില്ലെന്നും കെപിസിസി പ്രസിഡന്റ് ആവര്‍ത്തിച്ചു.
അതേസമയം കോണ്‍ഗ്രസിന് പങ്കില്ലെന്ന് പ്രതിപക്ഷ നേതാവ് വി.ഡി. സതീശന്‍ പറഞ്ഞു. ബോംബാക്രമണം കോണ്‍ഗ്രസ് ശൈലി അല്ല. സര്‍ക്കാര്‍ പ്രതിരോധത്തില്‍ നിന്ന് നില്‍ക്കുമ്പോള്‍ വിഷയം തിരിച്ചുവിടാന്‍ കോണ്‍ഗ്രസ് ശ്രമിക്കുമോ. പോലീസ് അന്വേഷിച്ച് തീരുമാനിക്കും മുമ്പ് സിപിഎം കോണ്‍ഗ്രസിനെതിരായി ആരോപണം ഉന്നയിക്കുന്നത് ശരിയല്ല. ആക്രമണത്തിന് പിന്നില്‍ കോണ്‍ഗ്രസാണെന്ന പ്രസ്താവന പോലും നേരത്തെ തയ്യാറാക്കിവെച്ചതാണെന്നും വി.ഡി.സതീശന്‍ കൂട്ടിച്ചേര്‍ത്തു.
പ്രതികരിക്കാൻ ഇവിടെ എഴുതുക: