കാഞ്ഞാണി : മാനസിക വിഭ്രാന്തിയുള്ള സ്ത്രീ അക്രമാസക്തയായതിനെ തുടർന്ന് ഫയർഫോഴ്സ് സ്ഥലത്തെത്തി വല ഉപയോഗിച്ച് കീഴ്പ്പെടുത്തി ആശുപത്രിയിലാക്കി. താന്ന്യം കുറുവത്ത് ക്ഷേത്രത്തിനു സമീപം താമസിക്കുന്ന സ്ത്രീയാണ് 10 വയസുകാരി മകളെ ഒപ്പം നിർത്തി വീടിനകത്ത് ഭീകരാന്തരീക്ഷം സൃഷ്ടിച്ചത്.
സ്വബോധം നഷ്ടപ്പെട്ട ഇവർ വീടിനകത്തെ ജനലിലെയും ഊണുമേശയിലെയും ചില്ലുകൾ ചുറ്റികയും വെട്ടുകത്തിയും ഉപയോഗിച്ച് തല്ലിത്തകർത്തു. അന്തിക്കാട് പോലീസ് അറിയിച്ചതിനെ തുടർന്ന് സ്റ്റേഷൻ ഓഫീസർ എ.എൽ. ലാസറിന്റെ നേതൃത്വത്തിൽ നാട്ടിക ഫയർ ആൻഡ് റെസ്ക്യൂ സേന സ്ഥലത്തെത്തി. വാതിൽ ബലമായി തുറക്കാൻ ശ്രമിച്ചപ്പോൾ സ്ത്രീ കുട്ടിയുടെ കഴുത്തിൽ കയർ ഇടാനായി ശ്രമിച്ചു. ഇതോടെ ഫയർഫോഴ്സ് അംഗങ്ങൾ വാതിൽ ചവിട്ടിപ്പൊളിച്ച് അകത്തെത്തി.
ഉദ്യോഗസ്ഥനായ ടി.ആർ. ജയകുമാറിനെ സമനില തെറ്റിയ സ്ത്രീ 2 തവണ ആഞ്ഞു കുത്തിയെങ്കിലും ഒഴിഞ്ഞു മാറിയതിനാൽ വൻ അപകടം ഒഴിവായി. തുടർന്ന് സ്ത്രീയെ സേനാംഗങ്ങൾ വലയെറിഞ്ഞ് കീഴ്പ്പെടുത്തുകയായിരുന്നു. ഇവരെ പോലീസ് സഹായത്തോടെ ആശുപത്രിയിലേക്ക് മാറ്റി. ഫയർഫോഴ്സ് സേനാംഗങ്ങളായ എം.എ. ചന്ദ്രൻ, മനു, വിപിൻദത്ത്, വിഷ്ണു, അനിൽരാജ്, കൃഷ്ണൻ, രാധ ചന്ദൻ തുടങ്ങിയവർ രക്ഷാപ്രവർത്തനത്തിൽ പങ്കാളികളായി.
