ന്യൂദല്‍ഹി: കോണ്‍ഗ്രസ്സില്‍ നിന്നു രാജിവച്ചതിനു പിന്നാലെ പാര്‍ട്ടി നേതൃത്വത്തിനെതിരെ കടുത്ത വിമര്‍ശനമുന്നയിച്ച് ഹാര്‍ദിക് പട്ടേല്‍. മുതിര്‍ന്ന നേതാക്കളുടെ ശ്രദ്ധ ഫോണിലാണെന്നും ഗുജറാത്തിലെ കോണ്‍ഗ്രസ് നേതാക്കള്‍ക്ക് താല്‍പര്യം ചിക്കന്‍ സാന്‍വിച്ച് ഉറപ്പാക്കുന്നതിലാണെന്നും ഹാര്‍ദിക് തുറന്നടിച്ചു. കോണ്‍ഗ്രസ് നേതാവ് രാഹുല്‍ ഗാന്ധിക്കെതിരെയും ഹാര്‍ദിക് പട്ടേല്‍ വിമര്‍ശനമുയര്‍ത്തി.
‘ഞാന്‍ മുതിര്‍ന്ന നേതാക്കളുമായി കൂടിക്കാഴ്ച നടത്തിയപ്പോള്‍ അവരുടെ ശ്രദ്ധ ഫോണിലായിരുന്നു.ഗുജറാത്തിനെ സംബന്ധിക്കുന്ന വിഷയങ്ങള്‍ കേള്‍ക്കാന്‍ അവര്‍ താല്‍പര്യം കാണിച്ചില്ല. ഗുജറാത്തിനെയും അവിടുത്തെ ജനങ്ങളെയും വെറുക്കുന്നത് പോലെയാണ് അവരുടെ പെരുമാറ്റം.ഗുജറാത്തിലെ മുതിര്‍ന്ന നേതാക്കന്‍മാര്‍ക്ക് സംസ്ഥാനത്തെത്തുന്ന നേതാക്കളെ സന്ദര്‍ശിച്ച് അവര്‍ക്ക് ചിക്കന്‍ സാന്‍വിച്ച് ഉറപ്പു വരുത്തുന്നതിലാണ് കൂടുതല്‍ താല്‍പര്യം എന്ന് മുന്‍ കോണ്‍ഗ്രസ് ഗുജറാത്ത് വര്‍ക്കിംഗ് പ്രസിഡന്റ് തുറന്നടിച്ചു.
നമ്മുടെ നേതാവിനെ രാജ്യത്ത് ആവശ്യമുണ്ടായിരുന്ന സുപ്രധാനസമയത്ത് അദ്ദേഹം വിദേശത്തായിരുന്നു.രാഹുല്‍ ഗാന്ധി ഗുജറാത്തിലെത്തിയപ്പോള്‍ തന്നെ പ്രത്യേകമായി കണ്ടില്ല. തന്നെ സഹായിക്കാന്‍ ദല്‍ഹിയില്‍ ഗോഡ്ഫാദര്‍മാരില്ല. തന്റെ സ്വന്തം യോഗ്യതകള്‍ മുന്‍നിര്‍ത്തി പ്രവര്‍ത്തിക്കേണ്ടതുണ്ടെന്ന് അദ്ദേഹം പറഞ്ഞു. നരേന്ദ്രമോദിയുടെ നേതൃത്വത്തിലുള്ള സര്‍ക്കാര്‍ എന്ത് ചെയ്താലും അവരെ എതിര്‍ക്കുന്നത് മാത്രമായി കോണ്‍ഗ്രസ് രാഷ്‌ട്രീയം എന്ന് അദ്ദേഹം വിമര്‍ശിച്ചു.ജനങ്ങളുടെ മുന്‍പില്‍ അവതരിപ്പിക്കാന്‍ ഒരു മാര്‍ഗരേഖ പോലുമില്ലെന്ന് അദ്ദേഹം പരിഹസിച്ചു.’
ലോക്‌സഭാ തിരഞ്ഞെടുപ്പിന് മുന്‍പ് 2019ലാണ് ഹാര്‍ദിക് പട്ടേല്‍ കോണ്‍ഗ്രസില്‍ ചേര്‍ന്നത്. കോണ്‍ഗ്രസ് നേതാക്കള്‍ തന്നെ മാറ്റിനിര്‍ത്തുകയാണെന്ന് അദ്ദേഹം മുന്‍പ് ആരോപിച്ചിരുന്നു. ഗുജറാത്തില്‍ നിയമസഭാ തിരഞ്ഞെടുപ്പ് അടുത്തിരിക്കെയാണ് കോണ്‍ഗ്രസിന് തിരിച്ചടിയായി ഹാര്‍ദിക് പാര്‍ട്ടി വിട്ടത്.
പ്രതികരിക്കാൻ ഇവിടെ എഴുതുക: