വാരണാസി: ഗ്യാന്വാപി മസ്ജിദില് കഴിഞ്ഞ മൂന്ന് ദിവസമായി നടന്നുവരുന്ന വീഡിയോ ചിത്രീകരണത്തിന്റെ റിപ്പോര്ട്ട് സമര്പ്പിക്കാന് രണ്ട് ദിവസം കൂടി സമയം ആവശ്യപ്പെട്ട് കോടതി നിയോഗിച്ച സ്പെഷ്യല് കമ്മീഷണര് വിശാല് സിങ്ങ്. നേരത്തെ മെയ് 17ന് ഈ റിപ്പോര്ട്ട് സമര്പ്പിക്കാനായിരുന്നു കോടതി ആവശ്യപ്പെട്ടിരുന്നത്. മറ്റൊരു അസിസ്റ്റന്റ് കമ്മീഷണറായ അജയ് പ്രതാപ് സിങ്ങും സര്വ്വേ റിപ്പോര്ട്ട് സമര്പ്പിക്കാന് സമയം നീട്ടിച്ചോദിച്ചു. ഇതിനിടെ മുസ്ലിം വിഭാഗത്തിന് എതിര്പ്പുള്ള അജയ് കുമാര് മിശ്രയെ കമ്മീഷണര് പദവിയില് നിന്നും നീക്കം ചെയ്തും വാരണസി കോടതി ചൊവ്വാഴ്ച ഉത്തരവിട്ടിട്ടുണ്ട്.
ഇവിടെ ഹിന്ദുവിഗ്രഹങ്ങളുണ്ടെന്നും അവയെ നിത്യാരാധന നടത്താന് അനുവദിക്കണമെന്നും ആവശ്യപ്പെട്ട് അഞ്ച് സ്ത്രീകള് നല്കിയ പരാതിയെ തുടര്ന്നാണ് വാരണാസി സിവില് കോടതി വീഡിയോ ചിത്രീകരണം നടത്താന് ഉത്തരവിട്ടത്.
കമ്മീഷണറുടെ ഈ അപേക്ഷയില് ചൊവ്വാഴ്ച നാല് മണിക്ക് വാരണസി സിവില് കോടതി വിധി പ്രസ്താവിക്കും. കഴിഞ്ഞ മൂന്ന് ദിവസമായി ഇരു സമുദായങ്ങളിലെയും അഭിഭാഷകര് ഉള്പ്പെടെ കോടതി നിയോഗിച്ച കമ്മീഷണറുടെ മേല്നോട്ടത്തില് ഗ്യാന്വാപി മസ്ജിദില് സര്വ്വേ നടത്തിവരികയായിരുന്നു. സര്വ്വേയുടെ മൂന്നാമത്തെയും അവസാനത്തെയും ദിനമായ തിങ്കളാഴ്ചയാണ് ഹിന്ദുവിഭാഗക്കാരുടെ അഭിഭാഷകനായ മദന് മോഹന് യാദവ് പള്ളിക്കകത്ത് ശിവലിംഗ് കണ്ടെത്തിയതായി അറിയിച്ചത്. നിസ്കാരത്തിന് മുന്പ് ദേഹശുദ്ധി വരുത്താന് ഉപയോഗിക്കുന്ന വാട്ടര് ടാങ്ക് വറ്റിച്ചപ്പോഴാണ് ശിവലിംഗം കണ്ടെത്തിയത്. ഇതിനര്ത്ഥം ഈ മസ്ജിദിനുള്ളില് ക്ഷേത്രമുണ്ടായിരുന്നുവെന്നാണെന്നും അഭിഭാഷകര് വാദിക്കുന്നു. 12 അടിയ ഉയരവും എട്ടിഞ്ച് വ്യാസവുമുള്ളതാണ് ഈ കൂറ്റന് ശിവലിംഗമെന്ന് മറ്റൊരു അഭിഭാഷകനായ വിഷ്ണു ജെയിനും പറയുന്നു.
എന്നാല് മുസ്ലിം വിഭാഗം അഭിഭാഷകന് മിറാസുദ്ദീന് ഇത് നിഷേധിച്ചു. ജലധാരയുടെ ഭാഗമാണ് ഈ ശിവലിംഗമെന്ന പേരില് കണ്ടെത്തിയ വസ്തുവെന്നാണ് മിറാസുദ്ദീന്റെ വാദം. എന്തായാലും ശിവലിംഗം കണ്ടെത്തിയ മസ്ജിദിന്റെ ഭാഗം മുദ്രവെച്ച് വേര്തിരിക്കാന് വാരണസി സിവില് കോടതി ഉടനെ ഉത്തരവിട്ടതിന്റെ അടിസ്ഥാനത്തില് അവിടെ വേര്തിരിച്ചിരിക്കുകയാണ്. സംഘര്ഷാവസ്ഥയാണ് മസ്ജിദിന്റെ പരിസരത്ത്. കനത്ത പൊലീസ് കാവലുണ്ട്.
