ന്യൂദല്ഹി : കോണ്ഗ്രസ് നേതാവ് പി. ചിദംബരത്തിന്റെ വീട്ടുകളിലും ഓഫീസുകളിലും സിബിഐ റെയ്ഡ്. ദല്ഹി മുംബൈ, ചെന്നൈ തമിഴ്നാട്ടിലെ ശിവഗംഗ എന്നിവിടങ്ങളിലെ വസതികളിലും ഓഫീസുകളിലുമാണ് സിബിഐ റെയ്ഡ് നടത്തുന്നത്. വിദേശ പണമിടപാടുമായി ബന്ധപ്പെട്ട് മകന് കാര്ത്തിക്കിനെതിരെ സിബിഐ പുതിയ കേസ് രജിസ്റ്റര് ചെയ്തിരുന്നു. ഇതുമായി ബന്ധപ്പെട്ടാണ് സിബിഐ തെരച്ചില് നടത്തിയത്.
നഗരങ്ങളിലുടനീളമുള്ള ഏഴോളം സ്ഥലങ്ങളിലാണ് സിബിഐ പരിശോധന നടത്തുണ്ട്. വിദേശ നിക്ഷേപം സ്വീകരിക്കാനായി ഐഎന്എക്സ് മീഡിയാ ടെലിവിഷന് കമ്പനിക്ക് വിദേശ നിക്ഷേപ പ്രോത്സാഹന ബോര്ഡിന്റെ (എഫ്ഐപിബി) അനുമതി ലഭ്യമാക്കിയതിലൂടെ ഡയറക്ടര് ബോര്ഡംഗങ്ങളില് നിന്ന് 3.5 കോടി രൂപാ കോഴ വാങ്ങിയെന്നതാണ് കാര്ത്തിക്കിനെതിരായ കേസ്. കമ്പനി ഡയറക്ടര്മാരായ പീറ്റര് മുഖര്ജി, ഇന്ദ്രാണി മുഖര്ജി എന്നിവരില് നിന്നാണ് കോഴ കൈപ്പറ്റിയത്.
പിതാവ് പി.ചിദംബരം ധനമന്ത്രിയായിരുന്ന 2007-ല് ധനമന്ത്രാലയത്തില് സ്വാധീനം ചെലുത്തിയാണ് മൗറീഷ്യസില് നിന്നും മുന്നൂറു കോടിയുടെ നിക്ഷേപം തരപ്പെടുത്താന് അനുമതി വാങ്ങി നല്കിയത്. കേസില് കാര്ത്തിയുടെ ചാര്ട്ടേഡ് അക്കൗണ്ടന്റ് എസ്. ഭാസ്കരരാമന് നേരത്തെ അറസ്റ്റിലായിരുന്നു. തമിഴ്നാട്ടില് നിന്നുള്ള ലോക്സഭാ അംഗം കൂടിയാണ് കാര്ത്തി ചിദംബരം.
