കോഴിക്കോട്: ചേവായൂരില് നടിയും മോഡലുമായ ഷഹനയെ ദുരൂഹ സാഹചര്യത്തില് മരിച്ച നിലയില് കണ്ടെത്തിയതില് ആരോപണവുമായി ബന്ധുക്കള്. ഷഹാന ആത്മഹത്യ ചെയ്യില്ലെന്നും മരണത്തില് ദുരൂഹതയുണ്ടെന്നും ബന്ധുക്കള് പറഞ്ഞു. സംഭവത്തില് ഭര്ത്താവ് സജാദിനെ പോലീസ് കസ്റ്റഡിയില് എടുത്തിട്ടുണ്ട്.
പണത്തിനുവേണ്ടി നിരന്തരം മകളെ ഭര്ത്താവ് സജാദ് ഉപദ്രവിച്ചിരുന്നുവെന്ന് ഷഹനയുടെ മാതാവ് ആരോപിച്ചു. ഷഹനയ്ക്ക് ആത്മഹത്യ ചെയ്യാനുള്ള യാതൊരു പ്രശ്നങ്ങളും ഇല്ലായിരുന്നു. ഇത് കൊലപാതകമാണെന്നും മാതാവ് ഉമൈബ പറഞ്ഞു.
സജാദും ഷഹാനയും തമ്മില് വിവാഹം കഴിഞ്ഞിട്ട് ഒന്നരവര്ഷമായി. ഇതിനിടയില് കുടുംബവുമായി നേരിട്ട് കാണാന് പോലും പറ്റിയിരുന്നില്ല. കോഴിക്കോട് എത്തുമ്പോള് സജാദിന്റെ സുഹൃത്തുക്കള് പിന്തുടര്ന്ന് തിരിച്ചയക്കുകയായിരുന്നു. തൊട്ടടുത്തുള്ള വീട്ടുകാര് രാത്രി വിളിച്ചറിയിച്ചാണ് മകളുടെ മരണ വിവരം അറിഞ്ഞതെന്നും കുടുംബം പറഞ്ഞു.
