കൊച്ചി : പ്രണയാഭ്യര്ത്ഥന നിരസിച്ചതിന് പിന്തുടര്ന്ന് അപമാനിക്കുന്നുവെന്ന നടി മഞ്ജു വാര്യരുടെ പരാതിയില് പോലീസ് അറസ്റ്റ് ചെയ്ത സംവിധായകന് സനല് കുമാര് ശശിധരന് കോടതി ജാമ്യം അനുവദിച്ചു. ആലുവ ഒന്നാം ക്ലാസ് ജുഡീഷ്യല് മജിസ്ട്രേറ്റ് കോടതിയാണ് ജാമ്യം അനുവദിച്ചത്. Â
2019 ആഗസ്റ്റ് മുതല് സനല്കുമാര് ശശിധരന് ശല്യം ചെയ്യുന്നവെന്നാണ് മഞ്ജുവിന്റെ പരാതി. സോഷ്യല് മീഡിയ വഴിയും ഫോണ് വഴിയും ബന്ധുക്കളും സുഹൃത്തുക്കളും വഴി സനല്കുമാര് ശശിധരന് പ്രണയാഭ്യര്ത്ഥന നടത്തി. ഇത് നിരസിച്ചതിലാണ് പിന്തുടര്ന്ന് ശല്യം ചെയ്യുന്നതെന്നും മഞ്ജു വാര്യര് പരാതിപ്പെടുന്നു.
ഭീഷണിപ്പെടുത്തല്, സോഷ്യല് മീഡിയ വഴി അപമാനിക്കല് തുടങ്ങിയ പരാതികളും സനല്കുമാര് ശശിധരനെതിരെയുണ്ട് ഇതില് 354 ഡി വകുപ്പിലാണ് എളമക്കര പോലീസ് കേസ് എടുത്തിരിക്കുന്നത്. പിന്തുടര്ന്ന് ശല്യപ്പെടുത്തുക നിരീക്ഷിക്കുക എന്നിവയാണ് സനല്കുമാര് ശശിധരന് മേല് ചുമത്തപ്പെട്ടിരിക്കുന്നത്. ശിക്ഷിക്കപ്പെട്ടാല് മൂന്ന് വര്ഷംവരെ തടവ് ശിക്ഷ ലഭിക്കുന്ന കുറ്റമാണ്.
താന് പോലീസിനെതിരല്ല മറ്റ് വിഷയങ്ങള് കോടതിയെ ധരിപ്പിക്കാനുണ്ടെന്നും സനല്കുമാര് ശശിധരന് പറഞ്ഞു. മഞ്ജുവാര്യരുടെ ജീവന് ഭീഷണിയുണ്ടെന്നും നിക്ഷിപ്ത താത്പര്യങ്ങളുള്ള സ്വന്തം ജീവനക്കാരുടെ തടങ്കലിലാണ് മഞ്ജു വാര്യരെന്നുമായിരുന്നു സനല് കുമാറിന്റെ ഫേസ്ബുക്ക് പോസ്റ്റ്.
തുടര്ന്ന് മഞ്ജു വാര്യര് സനലിനെതിരെ കേസ് നല്കുകയായിരുന്നു. തിരുവനന്തപുരം പാറശാലയില് വെച്ചാണ് സനല്കുമാറിനെ കസ്റ്റഡിയില് എടുക്കുന്നത്. ഇന്നോവ വാഹനത്തില് സിവില് ഡ്രസില് എത്തിയ ഉദ്യോഗസ്ഥര് പിടികൂടുമ്പോള് ഫേസ് ബുക്ക് ലൈവിലൂടെ കസ്റ്റഡി ദൃശ്യങ്ങള് സനല്കുമാര് ശശിധരന് പുറത്ത് വിട്ടിരുന്നു. അജ്ഞാത സംഘം തന്നെ തട്ടിക്കൊണ്ട് പോകാന് ശ്രമിക്കുകയാണെന്നായിരുന്നു സനല് കുമാര് പറഞ്ഞത്.
അതേസമയം മഞ്ജു വാര്യരോട് പ്രണയാഭ്യര്ത്ഥന നടത്തിയിട്ടുണ്ട് എന്നാല് പിന്നാലെ നടന്ന് ശല്യം ചെയ്തിട്ടില്ലെന്ന് സനല്കുമാര് ശശിധരന് ജാമ്യത്തിലിറങ്ങിയ ശേഷം പ്രതികരിച്ചു. അവരുമായി സംസാരിച്ചിട്ട് തന്നെ കുറേക്കാലമായി. കയറ്റം എന്ന സിനിമ റിലീസാകാത്തത് എന്തുകൊണ്ട് എന്ന് കൂടി അറിയാനാണ് മഞ്ജുവിനെ ബന്ധപ്പെടാന് ശ്രമിച്ചത്. പക്ഷേ അവര് സമ്മതിച്ചില്ല. മഞ്ജുവിന്റെ കാര്യത്തിലുള്ള ആശങ്കയാണ് താന് പ്രകടിപ്പിച്ചത്. ഈ വിഷയം ഇനി ഉന്നയിക്കാനും ഉദ്ദേശിക്കുന്നില്ലെന്നും അദ്ദേഹം പറഞ്ഞു.
തന്റെ ഡ്യൂട്ടി എന്ന് പറയുന്നത് തനിക്കൊപ്പം ജോലി ചെയ്ത ഒരാള്ക്ക് ഒരു ആപത്തുണ്ട് എന്ന് തനിക്ക് തോന്നുമ്പോ അത് സത്യസന്ധമായിട്ട് പറഞ്ഞു. അത് ലഘുവായിട്ട് എടുക്കാന് പറ്റാത്തതുകൊണ്ട് രാഷ്ട്രപതിക്കും ചീഫ് ജസ്റ്റിസിനും കത്തയച്ചു. ക്രമസമാധാനം വളരെയധികം അട്ടിമറിക്കപ്പെടുന്നു എന്ന തന്റെ ആശങ്ക അറിയിച്ചു. ഒരു ആര്ട്ടിസ്റ്റ് എന്ന നിലയില് കടമ ചെയ്തു. അത് എഴുതിയതിന് പിറ്റേ ദിവസമാണ് ഇങ്ങനെ ഒരു കേസ് വരുന്നത്.
ജാമ്യം കിട്ടാവുന്ന കുറ്റമാണ് ചുമത്തിയത്. സ്റ്റേഷന് ജാമ്യം നല്കാം എന്ന് പറഞ്ഞതാണ്. ഞാന് അത് വേണ്ട എന്ന് പറഞ്ഞതാണ്. അതിന് കാരണം കോടതിയില് വന്ന് എനിക്ക് പറയാനുള്ളത് പറയണം എന്നുള്ളതുകൊണ്ടാണ്. ഒന്ന് ഫോണില് വിളിച്ചാല് താന് സ്റ്റേഷനില് എത്തിയേനെ. അതിന് പകരം ക്ഷേത്രത്തിലേക്ക് പോകുന്നവഴിക്ക് തന്നെ വളഞ്ഞിട്ട് പിടിച്ച് ബലമായി കൊണ്ടുപോകാന് ശ്രമിക്കുകയായിരുന്നു. മഞ്ജുവിന് ശല്യമുണ്ടായിരുന്നെങ്കില് അവര്ക്ക് തന്നെ വിളിച്ചിട്ട് പറയാമായിരുന്നുവെന്നും സനല് കുമാര് ശശിധരന്.
Â
