പാലക്കാട്: കേരളത്തില്‍ ഇരു ഭീകരതകള്‍ ഉണ്ടെന്ന സിപിഎം പ്രചാരണം ഇസ്ലാമിക ഭീകരതയെ സംരക്ഷിക്കാനുള്ള കുടില തന്ത്രമാണെന്ന് പ്രജ്ഞാപ്രവാഹ് ദേശീയ സംയോജകന്‍ ജെ. നന്ദകുമാര്‍ പറഞ്ഞു. പോപ്പുലര്‍ ഫ്രണ്ട് അക്രമത്തില്‍ കൊല്ലപ്പെട്ട ശ്രീനിവാസന്റെ വീട് സന്ദര്‍ശിച്ചതിനു ശേഷം മാധ്യമങ്ങളോട് സംസാരിക്കുകയായിരുന്നു അദ്ദേഹം. ഈ നിരര്‍ത്ഥക വാദം കേരളത്തിന്റെ ഭാവിയെ അപകടത്തിലാക്കുന്നതാണ്.
കേരളത്തില്‍ പോപ്പുലര്‍ ഫ്രണ്ടിന്റെ അക്രമത്തിനിരയാകാത്ത രാഷ്‌ട്രീയ പാര്‍ട്ടികളില്ല. നാദാപുരത്തെ ബിനുവിന്റെയും മഹാരാജാസ് കോളജിലെ അഭിമന്യുവിന്റെയും കൊലപാതകികളെ വെള്ളപൂശാനാണ് സിപിഎം ഇരു ഭീകരതാ പ്രചാരണവുമായി രംഗത്തെത്തിയിരിക്കുന്നത്.
ആര്‍എസ്എസിനെ സംഘടനാപരമായി തകര്‍ക്കാന്‍ ശ്രമിച്ച സിപിഎം അതില്‍ ദയനീയമായി പരാജയപ്പെട്ടപ്പോള്‍ അക്രമം ഔട്ട്‌സോഴ്‌സ് ചെയ്യുകയാണ്. സംഘടിത വോട്ട് ബാങ്കിനെ ഭയന്ന് കോണ്‍ഗ്രസും ഭീകരപ്രവര്‍ത്തനത്തെ മൗനമായി പിന്തുണക്കുകയാണ്. പാലക്കാട് നഗരത്തില്‍ നടന്ന ഭീകരാക്രമണത്തെ അപലപിക്കാന്‍ പാലക്കാട് എംഎല്‍എ ഇതുവരെ തയ്യാറായിട്ടില്ല. പള്ളികളെ അക്രമികള്‍ ദുരുപയോഗം ചെയ്തിട്ടും എംഎല്‍എ മൗനം പാലിക്കുന്നത് ദുരൂഹമാണ്.
ലക്ഷണമൊത്ത ഭീകരാക്രമണങ്ങളാണ് പോപ്പുലര്‍ ഫ്രണ്ട് നടപ്പാക്കുന്നത്. ഇതിന് പള്ളികളെ ദുരുപയോഗം ചെയ്യുന്നു. അക്രമത്തിനുള്ള ആസൂത്രണത്തിനും കൊലപാതകികളുടെ ഒളിത്താവളമായും പള്ളികളെ ഉപയോഗിക്കുന്നു. മുസ്ലിം സമൂഹത്തെ മൊത്തം കരിവാരിത്തേയ്‌ക്കുന്ന ഇത്തരം നടപടികള്‍ക്കെതിരെ മുസ്ലീം സംഘടനകളും സാമുദായിക നേതാക്കളും രംഗത്തു വരാത്തത് ആശ്ചര്യകരമാണ്.
മാറാട് കൂട്ടക്കൊലയിലും പള്ളികളെ ദുരുപയോഗം ചെയ്തിരുന്നു. അതിഭീകരമായ മാറാട് കൂട്ടക്കൊല സൃഷ്ടിച്ച ഭീകരാന്തരീക്ഷത്തേയും ജനാധിപത്യ രീതികളിലൂടെ അതിജീവിക്കാന്‍ ഒറ്റക്കെട്ടായി നിലനിന്ന ഹിന്ദുസമൂഹത്തിന് കഴിഞ്ഞു. അക്രമികളും അതിന് ഒത്താശ നല്‍കുന്നവരും ഈ പാഠം ഓര്‍മ്മിക്കണം, അദ്ദേഹം പറഞ്ഞു.
പ്രതികരിക്കാൻ ഇവിടെ എഴുതുക: