ന്യൂദല്ഹി: കുട്ടിക്കാലത്ത് നേരിടേണ്ടി വന്ന ലൈഗിംകാതിക്രമത്തെ കുറിച്ച് തുറന്ന് പറഞ്ഞ് ബോളിവുഡ് നടി കങ്കണ റണാവത്. ‘ലോക്കപ്പ്’ റിയാലിറ്റി ഷോയുടെ ഞായറാഴ്ചത്തെ എപ്പിസോഡില് മുനവര് ഫാറൂഖിയോടാണ് കങ്കണ തുറന്നുപറച്ചില് നടത്തിയത്. ഒരു ടാസ്കിന്റെ സമയത്ത് മുനവര് സമാനമായ അനുഭവം തുറന്ന് പറഞ്ഞതിന് പിന്നാലെയായിരുന്നു കങ്കണയുടെ വെളിപ്പെടുത്തല്.
‘കുട്ടികള്ക്ക് മോശമായ രീതിയില് സ്പര്ശനമേല്ക്കേണ്ടി വരുന്നുണ്ട്. ചെറുപ്പത്തില് എനിക്കും സംഭവിച്ചിട്ടുണ്ട്. നാട്ടില്ത്തന്നെയുള്ള ഒരു പയ്യന് എന്നെ മോശം രീതിയില് സ്പര്ശിക്കുമായിരുന്നു. കുട്ടിയായതുകൊണ്ട് അന്ന് എന്താണ് സംഭവിക്കുന്നതെന്ന് തിരിച്ചറിഞ്ഞില്ല. കുടുംബം എത്ര കരുതിയാലും ഇങ്ങനെയുള്ള സാഹചര്യങ്ങളിലൂടെ കുട്ടികള്ക്ക് കടന്നുപോകേണ്ടിവരുന്നുണ്ട്. പ്രതിവര്ഷം നിരവധി കുട്ടികള്ക്കാണ് മറ്റുള്ളവരില് നിന്ന് ലൈംഗിക ചുവയോടെയുള്ള പെരുമാറ്റങ്ങള് അഭിമുഖീകരിക്കേണ്ടി വരുന്നതെന്ന് കങ്കണ പറഞ്ഞു. പക്ഷേ പലരും ഇത് പൊതു ഇടത്തില് തുറന്നുപറയാന് തയ്യാറാവുന്നില്ല.’കങ്കണ പറഞ്ഞു.
ഇയാള് എന്നേക്കാള് മൂന്നോ നാലോ വയസ്സിന് മൂത്തതായിരുന്നു. അവന് ഞങ്ങളെ വിളിച്ച് വസ്ത്രം ഉരിഞ്ഞ് പരിശോധിക്കും. അത് വലിയ തെറ്റാണെന്ന് ഞങ്ങള്ക്ക് ആ സമയത്ത് മനസിലായിരുന്നില്ലെന്നും കങ്കണ പറഞ്ഞു.
റിയാലിറ്റി ഷോയിലെ ഒരു മത്സരാര്ത്ഥി ആറു വയസുള്ളപ്പോള് തനിക്ക് ലൈംഗികപീഡനം ഏല്ക്കേണ്ടിവന്നു എന്ന് തുറന്നുപറഞ്ഞപ്പോഴാണ് തനിക്കും സമാനരീതിയിലുള്ള അനുഭവമുണ്ടായിട്ടുണ്ടെന്ന് കങ്കണ വെളിപ്പെടുത്തിയത്.
