പാലാ: തീവ്രവാദത്തോടൊപ്പം വിഘടന വാദവും കേരളത്തില് ശക്തിപ്രാപിക്കുന്നതായി ഹിന്ദു ഐക്യവേദി സംസ്ഥാന പ്രസിഡന്റ് കെ.പി. ശശികല ടീച്ചര്. മീനച്ചില് നദീതട ഹിന്ദു മഹാസംഗമത്തില് മുഖ്യപ്രഭാഷണം നടത്തുകയായിരുന്നു അവര്. ഇന്ത്യന് റെയില്വേയുടെയും ഭാരത് ടെലഫോണിന്റെയും സ്ഥാനത്ത് കേരളത്തില് കെ.റെയിലും കെ. ഫോണും വന്നുകഴിഞ്ഞു. ഇനി കെ. വെള്ളവും കെ. വെളിച്ചവും ഉടനെ നമുക്ക് പ്രതീക്ഷിക്കാം. കേരളം ഭാരതത്തിന്റെ ഭാഗമല്ലെന്ന തോന്നല് ഇവിടുത്തെ ഭരണക്കാര് സൃഷ്ടിക്കുകയാണെന്നും ശശികല ടീച്ചര് പറഞ്ഞു.
വിശ്വഹിന്ദു പരിഷത്ത് സംസ്ഥാന പ്രസിഡന്റും ചലച്ചിത്ര സംവിധായകനുമായ വിജി തമ്പി അധ്യക്ഷനായി. ഹിന്ദുക്കള് പാര്ശ്വവത്കരിക്കപ്പെട്ടിരിക്കുന്നു. പ്രശ്നങ്ങളെ അടിസ്ഥാനപ്പെടുത്തിയാണ് ഹിന്ദു ഒന്നിക്കുന്നതെന്ന് അദ്ദേഹം പറഞ്ഞു. സ്വാമി സ്വപ്രഭാനന്ദ അനുഗ്രഹ പ്രഭാഷണം നടത്തി. ഹൃദയ മാറ്റ ശാസ്ത്രക്രിയകളും സംസ്ഥാനത്തെ മെഡിക്കല് കോളജ് ആശുപത്രിയില് ആദ്യമായി കരള് മാറ്റിവയ്ക്കല് ശസ്ത്രക്രിയയും വിജയകരമായി നടത്തിയ കോട്ടയം മെഡി. കോളജ് സൂപ്രണ്ട് ഡോ. ടി.കെ. ജയകുമാര്, നോക്കുവിദ്യ പാവകളി കലാകാരി പത്മശ്രീ പങ്കജാക്ഷിയമ്മ, ആദിവാസി ഗോത്രമേഖലയിലെ മികച്ച സാമൂഹിക പ്രവര്ത്തകയ്ക്കുള്ള പുരസ്കാരം ലഭിച്ച പി.കെ. വത്സമ്മ എന്നിവരെ സമ്മേളനത്തില് ആദരിച്ചു.
ഹിന്ദു മഹാസംഗമം ഉപാധ്യക്ഷന് എം. ജി.സുരേഷ്, ജനറല് കണ്വീനര് മനീഷ് ഹരിദാസ് സംസാരിച്ചു. മാതൃസമ്മേളനത്തില് ആയുര്വേദ പരിഷത്ത് സംസ്ഥാന ജന. സെക്രട്ടറി ഡോ.ജയലക്ഷ്മി അമ്മാള് മുഖ്യപ്രഭാഷണം നടത്തി. പൂഞ്ഞാര് എസ്.എം.വി. ഹയര്സെക്കന്ഡറി സ്കൂള് റിട്ട. പ്രിന്സിപ്പല് ഷൈലജ ജി.നായര് അധ്യക്ഷയായി. മായ ജയരാജ്, മീരനന്ദ ജയന് എന്നിവര് സംസാരിച്ചു.
