കാഞ്ഞങ്ങാട്: മകളെ പീഡിപ്പിച്ച് ഗര്ഭിണിയാക്കിയ കേസില് അച്ഛന് അറസ്റ്റില്. പതിനാറുകാരിയായ മകളെയാണ് അച്ഛന് പീഡിപ്പിച്ചത്. സംഭവവുമായി ബന്ധപ്പെട്ട് 49 വയസ്സുകാരനായ പിതാവിനെ ഹോസ്ദുര്ഗ് പോലീസ് ഇന്സ്പെക്ടര് കെ.പി.ഷൈനും സംഘവും അറസ്റ്റ് ചെയ്തു.
പെണ്കുട്ടിയെ ഗര്ഭച്ഛിദ്രത്തിന് മംഗലാപുരത്തെ ആശുപത്രിയില് കൊണ്ടുപോകുന്നതിനിടെയാണ് അറസ്റ്റുണ്ടായത്. പെണ്കുട്ടി രണ്ട് മാസം ഗര്ഭിണിയാണ്. അച്ഛനെതിരെ പോക്സോ കേസ് രജിസ്റ്റര് ചെയ്തു. ഗര്ഭച്ഛിദ്രം നടത്താന് പെണ്കുട്ടിയുമായി നേരത്തെ കാഞ്ഞങ്ങാട്ടെ സ്വകാര്യ ആശുപത്രിയിലെത്തിയിരുന്നു. എന്നാല് ആശുപത്രി അധികൃതര് ചോദ്യങ്ങള് ചോദിച്ചതോടെ ഇവര് ഇവിടെ നിന്നും മടങ്ങി. തുടര്ന്ന് ആശുപത്രി അധികൃതര് പോലീസിനെ വിവരം അറിയിക്കുകയായിരുന്നു. പ്രതി ആശുപത്രിയില് നല്കിയ മൊബൈല് ഫോണ് കേന്ദ്രീകരിച്ച് നടത്തിയ അന്വേഷണത്തിലാണ് മംഗലാപുരത്ത് നിന്നും അറസ്റ്റിലാകുന്നത്.
ശാരീരിക അസ്വസ്ഥതകളെ തുടര്ന്ന് പെണ്കുട്ടിയെ പരിയാരം മെഡിക്കല് കോളേജില് പ്രവേശിപ്പിച്ചു. പെണ്കുട്ടിയെ വിശദമായ പരിശോധനയ്ക്ക് വിധേയമാക്കുമെന്ന് പോലീസ് അറിയിച്ചു. പ്രതിയ്ക്കെതിരെ പോക്സോ വകുപ്പുകള് അടക്കം ചുമത്തി കേസെടുക്കുമെന്നും പോലീസ് വ്യക്തമാക്കി. ആശുപത്രിയില് കഴിയുന്ന പെണ്കുട്ടിയില്നിന്നും മൊഴിയെടുത്തശേഷം ഉച്ചയോടെ ഇയാളുടെ അറസ്റ്റ് രേഖപ്പെടുത്തി. ജില്ലാ ആശുപത്രിയില് വൈദ്യപരിശോധനയ്ക്ക് ശേഷം പ്രതിയെ ഹോസ്ദുര്ഗ് ഒന്നാംക്ലാസ് ജുഡീഷ്യല് മജിസ്ട്രേറ്റ് കോടതിയില് ഹാജരാക്കും. .
