തിരുവനന്തപുരം: കേരളത്തിലേയ്ക്ക് തന്നെ ക്ഷണിച്ചതില്‍ എല്ലാവരോടും നന്ദി പറയുന്നതായി വിവേക് രഞ്ചന്‍ അഗ്നിഹോത്രി. അനന്തപുരി ഹിന്ദുമഹാ സമ്മേളന വേദിയില്‍ എത്താന്‍ സാധിക്കുന്നതില്‍ സന്തോഷമുണ്ടെന്നും അഗ്നിഹോത്രി പറഞ്ഞു. കശ്മീര്‍ ഫയല്‍സിന്റെ വിജയശേഷം ആദ്യമായാണ് അദേഹം കേരളത്തില്‍ എത്തുന്നത്.
മികച്ച പിന്തുണയാണ് കേരളത്തില്‍ തന്റെ ചിത്രത്തിന് ലഭിച്ചത്. മറ്റൊരു ഹിന്ദി ഭാഷ ചിത്രത്തിനും ഇത്തരമൊരു സ്വീകാര്യത ലഭിച്ചിട്ടില്ല. തന്റെ അടുത്ത സിനിമ കേരളത്തിന് കൂടിയുള്ള സമ്മാനമായിരിക്കുമെന്നും അഗ്നിഹോത്രി പറഞ്ഞു.
വിവേക് അഗ്നിഹോത്രിയ്‌ക്ക് തിരുവനന്തപുരത്തേയ്‌ക്ക് സ്വാഗതം ആശംസിച്ചുകൊണ്ടുള്ള സന്ദേശങ്ങള്‍ സാമൂഹ്യമാധ്യമങ്ങളില്‍ തരംഗമായിരിക്കുകയാണ്. പ്രജ്ഞാ പ്രവാഹ് സംയോജകന്‍ ജെ. നന്ദകുമാര്‍, പ്രമുഖ ചാര്‍ട്ടേര്‍ഡ് അക്കൗണ്ടന്റ് രഞ്ജിത്ത് കാര്‍ത്തികേയന്‍ തുടങ്ങിയവരുടെ സ്വാഗത ട്വീറ്റുകള്‍ റീട്വീറ്റ് ചെയ്തുകൊണ്ടാണ് തന്റെ കേരള സന്ദര്‍ശനം അഗ്നിഹോത്രി ആരാധകരെ അറിയിച്ചത്.
ഏപ്രില്‍ 27 മുതല്‍ മേയ് 01 വരെ തിരുവനന്തപുരം സൗത്ത്‌ഫോര്‍ട്ട് പ്രിയദര്‍ശിനി ക്യാമ്പസിലാണ് അനന്തപുരി ഹിന്ദു മഹാസമ്മേളനം നടക്കുക. 27 വൈകുന്നേരം 5 മണിയ്‌ക്ക് കേരളാ ഗവര്‍ണര്‍ ആരിഫ് മുഹമ്മദ് ഖാന്‍ സമ്മേളനം ഉദ്ഘാടനം ചെയ്യും. അഞ്ചുദിവസങ്ങളിലായി നടക്കുന്ന സമ്മേളനങ്ങളില്‍ സ്വാമി ചിദാനന്ദപുരി, കേന്ദ്രമന്ത്രി വി.മുരളീധരന്‍ ജെ. നന്ദകുമാര്‍, പി.സി ജോര്‍ജ്, വല്‍സന്‍ തില്ലങ്കേരി, വിജി തമ്പി, ഡോ. വിക്രം സമ്പത്ത്, ഷെഫാലി വൈദ്യ, മേജര്‍ സുരേന്ദ്ര പൂന്യ തുടങ്ങിയവര്‍ പങ്കെടുക്കും. മേയ് ഒന്നിന് നടക്കുന്ന സമാപന സമ്മേളനം ഗോവാ ഗവര്‍ണര്‍ പി.എസ് ശ്രീധരന്‍ പിളള ഉദ്ഘാടനം ചെയ്യും.
സമ്മേളനത്തിന്റെ ഭാഗമായ ഹിന്ദുയൂത്ത് കോണ്‍ക്ലേവില്‍ നാലുദിനങ്ങളിലായി 16 സെമിനാറുകള്‍ സംഘടിപ്പിച്ചിട്ടുണ്ട്. വിവിധ വിഷയങ്ങളിലായി പ്രമുഖര്‍ സംസാരിക്കുന്നതിന് പുറമേ പാകിസ്ഥാനില്‍ നിന്നുള്ള ഹിന്ദുക്കളും സെമിനാറില്‍ പങ്കെടുക്കും. ഹിന്ദു യൂത്ത്‌കോണ്‍ക്ലേവിന്റെ ലോഗോയുടെ പ്രകാശനം പ്രമുഖ സാമൂഹ്യ നിരീക്ഷകനായ ശ്രീജിത്ത് പണിക്കര്‍ കഴിഞ്ഞ ആഴ്ച നിര്‍വഹിച്ചിരുന്നു.
പ്രതികരിക്കാൻ ഇവിടെ എഴുതുക: