ലഖ്നൗ: അനുവാദമില്ലാതെ ശോഭായാത്രയോ മതപരിപാടികളോ നടത്തരുതെന്ന് ഉത്തരവിറക്കി ഉത്തര്പ്രദേശ് സര്ക്കാര്. മതപരമായ പരിപാടികള് നടത്തുമ്പോള് സമാധാനവും സൗഹാര്ദവും നിലനിര്ത്തുമെന്ന് സംഘാടകര് സത്യവാങ്മൂലം നല്കണമെന്നും യു.പി സര്ക്കാര് പുറപ്പെടുവിപ്പിച്ച ഉത്തരവില് പറയുന്നു. ലൗഡ് സ്പീക്കറില് നിന്നുള്ള ശബ്ദം മറ്റുള്ളവര്ക്ക് അസൗകര്യമണ്ടാകുന്ന തരത്തിലാകരുതെന്നും സര്ക്കാര് വ്യക്തമാക്കി.
എല്ലാവര്ക്കും അവരുടേതായ ആരാധന രീതി പിന്തുടരാന് സ്വാന്ത്ര്യമുണ്ട് യോഗി ട്വീറ്റ് ചെയ്തു. ഉച്ചഭാഷിണി ഉപയോഗിക്കാമെന്നും എന്നാല്, ശബ്ദം മറ്റുള്ളവര്ക്ക് അസൗകര്യമുണ്ടാകുന്ന തരത്തിലായിരിക്കരുതെന്നും മുഖ്യമന്ത്രി വ്യക്തമാക്കി. സംസ്ഥാനത്തെ ഓരോ പൗരന്റെയും സുരക്ഷ സര്ക്കാറിന്റെ പ്രാഥമിക ഉത്തരവാദിത്തമാണ്. വേണ്ട മുന്കരുതലുകളെടുത്ത് എല്ലാ ഉത്സവങ്ങളും സമാധാനത്തോടെയും സൗഹാര്ദത്തോടെയും നടത്തണം. പ്രലോഭനമുണ്ടാക്കും വിധം പ്രസ്താവനകള് നടത്തുന്നവര്ക്കെതിരെ കര്ശന നടപടിയെടുക്കണമെന്നും യോഗി ആദിത്യനാഥ് വ്യക്തമാക്കി. പരമ്പരാഗതമായ മതഘോഷയാത്രകള്ക്ക് മാത്രമേ അനുമതി നല്കുകയുള്ളൂ. പുതിയ പരിപാടികള്ക്ക് അനുമതി നല്കുന്നത് ഒഴിവാക്കുമെന്നും മുഖ്യമന്ത്രി യോഗി ആദിത്യനാഥിന്റെ ഓഫീസ് അറിയിച്ചു.
രാജ്യത്തിന്റെ വിവിധ ഭാഗങ്ങളില് വര്ഗീയ കലാപങ്ങള് റിപ്പോര്ട്ട് ചെയ്ത പശ്ചാത്തലത്തിലാണ് മുഖ്യമന്ത്രി യോഗി ആദിത്യനാഥിന്റെ അധ്യക്ഷതയില് അവലോകന യോഗം ചേര്ന്നത്. രാമനവമി, ഹനുമാന് ജയന്തി ദിനാഘോഷങ്ങള്ക്ക് പിന്നാലെ ദല്ഹി, മധ്യപ്രദേശ്, ഗുജറാത്ത്, കര്ണാടക, മഹാരാഷ്ട്ര തുടങ്ങിയ സംസ്ഥാനങ്ങളില് സാമുദായിക സംഘര്ഷങ്ങള് റിപ്പോര്ട്ട് ചെയ്തിരുന്നു.
