കൊച്ചി : സിപിഎം കീഴ്ഘടകങ്ങളെ പല സ്ഥലങ്ങളിലും നിയന്ത്രിക്കുന്നത് വര്‍ഗ്ഗീയ ശക്തികളാണ്. പ്രണയിക്കുന്നവരെ മത പരിവര്‍ത്തനം നടത്തിയ ശേഷം വിവാഹം കഴിച്ച നിരവധി ഡിവൈഎഫ്‌ഐക്കാര്‍ കേരളത്തിലുണ്ട്. ഇവരെ ആരെയും പാര്‍ട്ടി തള്ളിപ്പറഞ്ഞിട്ടില്ലെന്ന് മുന്‍ സിപിഎം അനുയായി ചെറിയാന്‍ ഫിലിപ്പ്.
സിപിഎം സംസ്ഥാന കമ്മിറ്റി മുതല്‍ ബ്രാഞ്ച് കമ്മിറ്റി വരെ വിവിധ ഘടകങ്ങളില്‍ മത തീവ്രവാദികള്‍ നുഴഞ്ഞു കയറിയിട്ടുണ്ട്. പല ജില്ലകളിലും ജാതി മതാടിസ്ഥാനത്തില്‍ സിപിഎമ്മില്‍ വിഭാഗീയതയും നിലനില്‍ക്കുന്നുണ്ട്. മത സംഘടനകളില്‍ സജീവമായി പ്രവര്‍ത്തിക്കുന്ന പലരുമാണ് ഇപ്പോള്‍ സിപിഎമ്മിലെ സഹയാത്രികര്‍. ഇവര്‍ മുഖേനയാണ് സിപിഎം വര്‍ഗ്ഗീയ പ്രീണന നയം നടപ്പാക്കുന്നതെന്നും ഫേസ്ബുക്ക് പോസ്റ്റിലൂടെ ചെറിയാന്‍ ഫിലിപ്പ് വിമര്‍ശിച്ചു.
വര്‍ഗ്ഗീയ ശക്തികളാണ് പലയിടത്തും ഇപ്പോള്‍ സിപിഎം കീഴ്ഘടകങ്ങളെ നിയന്ത്രിക്കുന്നത്. ഭൂരിപക്ഷ വര്‍ഗ്ഗീയതയും ന്യൂനപക്ഷ വര്‍ഗ്ഗീയതയും ഒരുപോലെ അപകടകരമാണെങ്കിലും സിപിഎമ്മിന്റെ ഔദ്യോഗിക നയം വ്യക്തമല്ല. ഇക്കാര്യത്തില്‍ എം.വി. ഗോവിന്ദന്റെ അഭിപ്രായം പാര്‍ട്ടി നയമാണോയെന്ന് വ്യക്തമാക്കണമെന്നും അദ്ദേഹം പറഞ്ഞു. ഇടതു സഹയാത്രികനായിരുന്ന ചെറിയാന്‍ ഫിലിപ്പ് ഒക്ടോബര്‍ അവസാനത്തോടെയാണ് കോണ്‍ഗ്രസിലേക്ക് മാറിയത്. രണ്ട് പതിറ്റാണ്ടിന് ശേഷമായിരുന്നു ചെറിയാന്‍ ഫിലിപ്പിന്റെ ചുവട് മാറ്റം.
പ്രതികരിക്കാൻ ഇവിടെ എഴുതുക: